ރާއްޖޭގެ އެކި ހިސާބުތަކުން މީހުންނާ އެކު "ލޫޓޫވައިފި ލޫޓޫވައިފި" ނަމުގައި މިރޭ 8:30 ގައި މާލޭގައި ބޮޑު މުޒާހަރާއެއް ބޭއްވުމަށް އެމްޑީޕީން ދަނީ ތައްޔާރުވަމުންނެވެ.
އެކަމާ ގުޅިގެން، ގާސިމް އެކްސްގައި ކުރެއްވި ޕޯސްޓުގައި ވިދާޅުވީ އެއީ ބިނާކުރުވަނިވި މުޒާހަރާއެއް ނޫން ކަމަށާއި އެއީ ފަނާކުރުވަނިވި މުޒާހަރާއެއް ކަމަށެވެ. އެއީ ވެރިކަން ހޯދަންވެގެން ކުރާ ބޮޑު ނުބައި ކަމެއް ކަމަށް ވެސް ގާސިމް ވިދާޅުވި އެވެ.
ގާސިމް އިތުރަށް ވިދާޅުވިގޮތުގައި ވޭތުވެދިޔަ ސަރުކާރުތަކުން ސަރުކާރު ކުންފުނިތައް މެދުވެރިކޮށް ހިޔާނާތްތައް ހިންގާފައިވާ ކަމަށެވެ. އެކަންކަން އިސްލާހު ކުރަން އެ ސަރުކާރުތަކުން އެއްކަމެއް ވެސް ނުކުރާ ކަމަށް ގާސިމް ވިދާޅުވި އެވެ. އޭގެ ބަދަލުގައި މި ސަރުކާރުގައި އެފަދަ ކަންކަން ކުރާ ކަމަށް ތުހުމަތު ކުރެވޭ މީހުންނާ ދޭތެރޭ ރައީސް ޑރ. މުހައްމަދު މުއިއްޒު ފިޔަވަޅު އަޅުއްވާތަން ފެނިވަޑައިގަންނަވާ ކަމަށް ގާސިމް ވިދާޅުވި އެވެ.
ސަރުކާރު ދިފާއު ކުރައްވާ ސޯޝަލް މީޑިއާގައި ގާސިމް ދިގު ޕޯސްޓެއް ކުރެއްވި އިރު، ގާސިމްގެ ވިލާ ކުންފުނިން ހިންގަމުން އައި ގދ. ކާޑެއްދޫ އެއާޕޯޓު ސަރުކާރަށް ނަގައި ބަދަލެއްގެ ގޮތުގައި 18 މިލިއަން ޑޮލަރު (278 މިލިއަން ރުފިޔާ) ދޭން ސަރުކާރުން ވަނީ އެއްބަސްވެފަ އެވެ.
