ސަރުކާރުގެ ފަރާތުން ގުރައިދޫ ދާއިރާގެ މެންބަރު ހަނާން މުހައްމަދު ރަޝީދު ހުށަހެޅުއްވި ރީއެމްޕްލޯއިމަންޓް ބިލަށް ބަހުސްކުރައްވަމުން ޒަމީރު ވިދާޅުވީ، މިހާރު ސަރުކާރުގައި ތިއްބެވި ދޮށީ އުމުރުގެ ބޭފުޅުންނަކީ އެ ބޭފުޅުންގެ ޅަ އުމުރު ފުޅައިންސުރެން ފަށައިގެން ކުންފުންޏެއްގައި ނުވަތަ ސަރުކާރުގެ އޮފީހެއްގައި ވަޒީފާ އަދާކުރަމުން ގޮސް 65 ވެފައި ތިބި މީހުން ކަމަށެވެ.
އެގޮތުން އެމީހުންނަނީ މިއަދު ސަރުކާރަށް އެމީހުންގެ ހުނަރާއި އެމީހުންގެ ތައުލީމާއި ތަޖުރިބާއިން އިތުރުން ސަރުކާރަށް އެ މީހުން މުހިންމުވާ ފަދައިން އެ ކުންފުނި ނުވަތަ އެ އޮފީސް ހަކީ އާއިލީ ނުވަތަ ގެދޮރުކަމުގައި ކުލު ވަރަށް ބޮޑަށް އެތަނަކަށް ޖެހިފައިވާ ބައެއް ކަމަށެވެ.
ޒަމިރު ވިދާޅުވީ މި ސަރުކާރުގެ އަމާޒަކީ ދޮށީ އުމުރުގެ މީހުން ވެސް ބާކީނުވާނެ ގޮތް ހެދުން ކަމަށާއި އެ މަސައްކަތް ކުރުމަށް މިއަދުގެ ރައީސުލްޖުމްހޫރިއްޔާ އަކީ ރައްޔިތުން ދެކެ ލޯބިވާ ވައުދުވާ ވައުދު ފުއްދާ ބޭފުޅެއް ކަން މި ބިލުން ވެސް ހާމަވާ ކަމަށެވެ.
ރާއްޖޭގައި މިހާރު އޮންނަ ރިޓަޔަމަންޓު އުމުރަކީ 65 އަހަރެވެ. އެއަށްފަހު ދައުލަތުން، ވަޒީފާއެއް އަދާކުރިޔަސް ނުކުރިޔަސް، ކޮންމެ މީހަކަށް 5،000ރ. ގެ އެލަވަންސެއް ލިބެ އެވެ.
ސަރުކާރުގެ ފަރާތުން މަޖިލީހަށް ހުށަހަޅާފައިވާ ރި އެމްޕްލޯއިމަންޓު ބިލު ގާނޫނަކަށް ވުމުން ދައުލަތުގެ އިދާރާތަކުގައި މަސައްކަތް ކުރަމުން ދަނިކޮށް އުމުރުން 65 އަހަރު ފުރޭ މީހުންނަށް އެމީހުންގެ އުމުރުން 75 އަހަރު ފުރުމާ ހަމައަށް ދައުލަތުގެ އިދާރާތަކުގައި އަލުން ވަޒީފާ އަދާކުރެވޭނެ އެވެ.
އޭގެ ތެރެއިން ދައުލަތުގެ ވަޒީފާ މިހާރު އަދާކުރަމުންދާ މީހުން، ރީއެމްޕްލޯއީމެންޓް އުސޫލުގެ ދަށުން ވަޒީފާ އަދާކުރަން ބޭނުންނަމަ އެ މީހެއްގެ އުމުރުން 65 އަހަރު ފުރުމުގެ ހަ މަސްދުވަސް ކުރިން އެކަމަށް އެދި ހުށަހަޅަންޖެހެ އެވެ.
ދައުލަތުގެ ވަޒީފާއެއް އަދާކުރަމުންދިޔަ މީހުންގެ ތެރެއިން އެ ބިލު ގާނޫނަކަށްވުމުގެ ހަތް އަހަރު ކުރިން 65 އަހަރު ފުރުމުގެ ސަބަބުން ވަޒީފާއިން ވަކިވެފައިވާ މީހަކު ނަމަ މި ބިލު ގާނޫނަކަށްވާތާ ހަތަރު މަސް ދުވަސް ހަމަވުމުގެ ކުރިން އެކަމަށް އެދި ހުށަހަޅަން ޖެހެ އެވެ.
