މޭރީގެ މަރުގެ މައްސަލާގައި ދައުވާ ލިބޭ ލަމްހާ، ޝަރިއަތް ނިމެންދެން މިއަދު އަލުން ބަންދު ކުރީ ގާޒީ އިބްރާހީމް ޒިހުނީ ކަމަށްވަނީ މައުލޫމާތު ލިބިފައެވެ.
ގާޒީ ޒިހުނީ ވަގުތީ ގޮތުން މި ކޭސްއާ ހަވާލުވީ ލަމްހާ ބަންދު ކުރަން ކުރިން ދެކޮޅު ހެދި ގާޒީ ހުސެއިން ފާއިޒް ރަޝާދު ސަސްޕެންޑް ކުރުމުންނެވެ.
މޭރީގެ މަރާ ގުޅިގެން ޝަރީއަތް ނިމެންދެން ބަންދުކޮށްފައި ވަނިކޮށް ލަމްހާ މީގެ ކުރިންވެސް ދެ ފަހަރެއްގެ މަތިން ދޫކޮށްލުމުން، މަތީ މަރުހަލާގެ ކޯޓަށް ގޮސްގެން ދައުލަތުން އޭނާ އަލުން ބަންދު ކުރިއެވެ.
ލަމްހާ، ފުރަތަމަ ބަންދުން ދޫކޮށްލާފައިވަނީ ނޮވެމްބަރު 2023 އެވެ. އެ ފަހަރު ވެސް ދައުލަތުން މައްސަލަ އިސްތިއުނާފުކުރިއެވެ. އޭގެ ފަހުން ވެސް ލަމްހާ ބަންދުން ދޫކޮށްލި މައްސަލަ ހައިކޯޓަށް ދިޔައެވެ.
މޭރީގެ މަރާ ގުޅިގެން ލަމްހާގެ މައްޗަށް ތިން ދައުވާއެއް ކުރެ އެވެ. އެއީ އެނގިހުރެ މީހަކު މެރުމުގައި ބައިވެރިވުމާއި، އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރުހިންގުން އަދި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމެވެ.
