މި އަހަރާއި މި އަންނަ އަހަރަކީ އެމަނިކުފާނުގެ ވައުދުތަކުގައި އަމަލީ ސިފަ ޖެހޭނެ އަހަރުތައް ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
Advertisement
ފުވައްމުލަކުގައި އެ ސިޓީގެ ރައްޔިތުންނާ މިރޭ ބައްދަލުކުރައްވާ ރައީސް ވިދާޅުވީ ވެރިކަމާ ހަވާލުވެވަޑައިގެންނެވި އިރު، ރާއްޖޭގެ އިގްތިސާދު ވެއްޓިފައި އޮތް އަނދަވަޅުން އަރައިގަނެ، ވަށައިޖެހޭ ތަރައްގީއެއް ގައުމަށް ގެނެވޭނެ ކަމުގެ ޔަގީންކަން އެބަ އޮތް ކަމަށެވެ.
ރައީސް ވިދާޅުވީ މީގެ ދެ އަހަރެއްހާ ދުވަސް ކުރިން ރާއްޖޭގެ އިގްތިސާދީ ހާލަތު އޮތީ ވަރަށް ނާޒުކު ފައްތަރެއްގައި ކަމަށެވެ. މި ސަރުކާރު ވެރިކަމަށް އައިރު ދިވެހި ދައުލަތް އޮތީ ވަރަށް ބޮޑަށް ދަރައި، "ބަނގުރޫޓުވުމުގެ ހާލަތުގައި" ކަމަށް ރައީސް ވިދާޅުވި އެވެ.
"މި އަހަރުގެ މިއަދާ ހަމައަށް އާދެވުނުއިރުގައި، ރާއްޖޭގެ އިގްތިސާދަށް ވަށައިޖެހޭ ތަރައްގީއެއް ގެނެވޭ ގޮތުގެ މަތިން ބައްޓަންކުރެވި، ރައްޔިތުންނަށް ވެފައި ހުރި ގިނަ ވައުދުތަކެއް ފުއްދުމަށްޓަކާ ގިނަ މަސައްކަތްތަކެއް ވަނީ ތަރުތީބުކުރެވިފައި،" ރައީސް ވިދާޅުވި އެވެ.
ރައީސް ވިދާޅުވީ މިއަދަކީ ފުވައްމުލަކުގެ ތަރައްގީގައި ވެސް އާ ސަފުހާއެއް އެއްލުނު ދުވަހެއް ކަމަށެވެ. އަދި މިއަދުގެ މި ދަތުރުފުޅު ހާއްސަކުރައްވަނީ ވެސް މި ރަށުގެ ރައްޔިތުން ބޭނުންވި މަޝްރޫއުތަކުގައި ހަގީގީ ކުލަ ޖެއްސުމަށް ކަމަށް ރައީސް ވިދާޅުވި އެވެ.
ފުވައްމުލަކުގައި ހިންގަން ނިންމާފައިވާ އެހެން ބައެއް މަޝްރޫއުތަކުގެ އެއްބަސްވުމުގައި ވެސް މިރޭގެ ރަސްމިއްޔާތުގައި ވަނީ ސޮއިކޮށްފަ އެވެ. އެ މަޝްރޫއުތަކަކީ؛
- ފުވައްމުލަކު ސްކޫލުގައި 16 ކްލާސްރޫމާއި ލެބް ގާއިމުކުރުމުގެ މަޝްރޫއު. އެ މަސައްކަތް ހަވާލުކުރީ އެމްޓީސީސީއާ.
- ޔޫތު ތާޑް ސްޕޭސް ތަރައްގީކުރުމުގެ މަޝްރޫއު. އެ މަޝްރޫއު ހަވާލުކުރީ ސެންޓަ ލޭންޑް ޕްރައިވެޓް ލިމިޓެޑުގެ ޕްރޮޖެކްޓްސްއާ.
- ސްޕޯޓްސް ކޮމްޕްލެކްސްއެއް ގާއިމުކުރުން. އެ މަޝްރޫއު ހަވާލުކުރީ އެމްއޭސީއެލްއާ.
- އިސްލާމިކް ސެންޓަރެއް އެޅުން. އެ މަޝްރޫއު ހަވާލުކުރީ އަފާމީ މޯލްޑިވްސް ޕްރައިވެޓް ލިމިޓެޑްއާ
- އޮފީސް ކޮމްޕްލެކްސް އިމާރާތެއް އެޅުން. އެ މަޝްރޫއު ހަވާލުކުރީ އެމްޓީސީސީއާ.
- ފުވައްމުލަކުގައި އާ ބަނދަރެއް ތަރައްގީކުރުން. އެ މަޝްރޫއު ހަވާލުކުރީ އެމްޓީސީސީއާ.
- މަގު ހެދުމުގެ މަޝްރޫއުގެ ތިންވަނަ ފިޔަވަހީގެ މަސައްކަތް. އެ މަޝްރޫއު ހަވާލުކުރީ އެމްޓީސީސީއާ.
- އިތުރު 75 ހައުސިން ޔުނިޓް އެޅުމުގެ މަޝްރޫއު. އެ މަސައްކަތް ހަވާލުކުރީ ދި ގްލަޓް އިންވެސްޓްމަންޓްސް ޕްރައިވެޓް ލިމިޓެޑްއާ.
- ސްކޭޓް ޕާކެއް ތަރައްގީކުރުން. އެ މަޝްރޫއު ހަވާލުކުރީ އެމްޓީސީސީއާ.
ރާއްޖޭގެ އެންމެ ދެކުނަށް ދެ ދުވަހަށް ކުރައްވާ މި ދަތުރުފުޅުގައި ރައީސް މާދަމާ ވަޑައިގަންނަވާނީ އައްޑުއަށެވެ. ރައީސް މާދަމާ އެންމެ ފުރަތަމަ ވަޑައިގަންނަވާނީ އައްޑޫ ހުޅުދު އާއި މީދުއަށެވެ. އަދި އެއަށް ފަހު އައްޑޫގެ ގުޅިފައިވާ ރަށްތަކަށް ވެސް ވަޑައިގަންނަވާނެ އެވެ.
