އެމްއެންޔޫ އާއި އުނގޫފާރު ކައުންސިލާ ދެމެދު މިއަދު ބޭއްވި ހާއްސަ ރަސްމިއްޔާތެއްގައި އެއްބަސްވުމެއްގައި މިއަދު ވަނީ ސޮއިކޮށްފައެވެ.
އެމްއެންޔޫގައި ބޭއްވި ރަސްމިއްޔާތެއްގައި، މި ކެމްޕަސް ގާއިމުކުރުމާ ގުޅޭ އެއްބަސްވުމުގައި ދެ ފަރާތުން ވަނީ ސޮއިކޮށްފަ އެވެ. މި އެއްބަސްވުމުގައި އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލަރު ޑރ. ޝެހެނާޒް އާދަމް އެވެ. އުނގޫފާރު ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އަބްދުﷲ ރަޝީދު އެވެ. މި ރަސްމިއްޔާތުގައި އުނގޫފާރު ކައުންސިލުން ވަނީ ކެމްޕަހަށް ބޭނުންވާ އިމާރާތް އެމްއެންޔޫއާ ރަސްމީކޮށް ހަވާލުކޮށްފަ އެވެ.
އުނގޫފާރުގައި އެމްއެންޔޫގެ ކެމްޕަހެއް ގާއިމުކުރުމުގެ މައިގަނޑު ބޭނުމަކީ ރ. އަތޮޅުގެ ރައްޔިތުންނަށް މަތީ ތައުލީމުގެ ފުރުސަތުތައް ފަސޭހަކަމާއެކު ފޯރުކޮށްދިނުން ކަމަށް އެމްއެންޔޫއިން ބުންޏެވެ. މި އާ ކެމްޕަހާއެކު، އަތޮޅުގެ ގިނަ އަދަދެއްގެ ދަރިވަރުންނަށް އެމީހުންގެ އަމިއްލަ ރަށާ ގާތުން މަތީ ތައުލީމު ހާސިލުކުރުމުގެ މަގުފަހިވެގެންދާނެ އެވެ. ފާހަގަކޮށްލެވޭ ގޮތުގައި، އެމްއެންޔޫއިން ދާދިފަހުން ވަނީ އިތުރު ބައެއް ރަށްރަށުގައި ވެސް މިފަދަ ކެމްޕަސްތައް ގާއިމުކުރުމަށް އެއްބަސްވުންތަކުގައި ސޮއިކޮށްފަ އެވެ.
