އެކޮން ހައްޔަރުކޮށްފައިވަނީ ލައިސަންސްއާއި އިންޝުއަރެންސް ނެތި ދުއްވުމުގެ ކުށެއްގައި ކޯޓަށް ހާޒިރުނުވުމުންނެވެ. މި ހައްޔަރާ ގުޅިގެން ދިއްލީގައި ބޭއްވުމަށް ހަމަޖެހިފައިވާ ޝޯ ކުރިއަށްދާނެ ކަމާމެދު ވަނީ ސުވާލު އުފެދިފައެވެ.
ހަބަރުތައް ބުނާ ގޮތުގައި، އެކޮން ހައްޔަރުކޮށްފައިވަނީ އެމެރިކާގެ އެޓްލާންޓާ ކައިރީގައިވާ ޗެމްބްލީ އިންނެވެ. އޭނާ ހައްޔަރުކުރީ، ލައިސަންސް ސަސްޕެންޑްކޮށްފައި ވަނިކޮށް އަދި އިންޝުއަރެންސް ނެތި ދުއްވުމުގެ މައްސަލައަކާ ގުޅިގެން ކޯޓަށް ހާޒިރުވާން އެންގުމުން ހާޒިރުވެފައި ނުވާތީއެވެ. ހައްޔަރުކުރުމަށްފަހު އޭނާ ވަނީ ޑިކ ކައުންޓީ ޖަލަށާއި އެއަށްފަހު ރޮޒްވެލް ސިޓީ ޖަލަށް ބަދަލުކޮށްފައެވެ.
އެކޮން ވަނީ ހައްޔަރުކުރި ދުވަހުއެކޭ އެއް ދުވަހެއްގައި ބެއިލްގެ ދަށުން މިނިވަންވެފައެވެ. ނަމަވެސް، ދިއްލީ ޝޯއަށް އެންމެ ދެ ދުވަހަށް ވެފައި ވަނިކޮށް މިފަދަ ކަމެއް ދިމާވުމުން، އިންޓަނޭޝަނަލް ދަތުރުތަކަށް އުނދަގޫތަކެއް ކުރިމަތިވެ، ޝޯ ބޭއްވުމަށް ހުރަސްތަކެއް އެޅިދާނެ ކަމަށް އޭނާގެ ސަޕޯޓަރުން އަންނަނީ ބުނަމުންނެވެ. މިކަމާ ގުޅިގެން ޝޯގެ އިންތިޒާމުތަކަށް ބަދަލެއް އަންނާނެ ކަމެއް އަދި ކަށަވަރެއް ނުވެއެވެ.
