މިރޭ އާޓިފިޝަލް ބީޗާއި، މަޖީދީ މަގާއި ބޮޑުތަކުރުފާނު މަގުގައި އެ ސަރަހައްދު އޮތީ އެއްވި މީހުންނާ އެކު ފުރި ތޮއްޖެހިފަ އެވެ.
ރައީސް ޑރ. މުއިއްޒުގެ ދެކަނބަލުން އާޓިފިޝަލް ބީޗު ސަރަހައްދަށް ވަޑައިގެންނެވިއިރު އެ ސަރަހައްދުގައި އެއްވެ ތިބި އެތައް ހާސް ބަޔަކު ރައީސް ސަލާމްކުރަމުން ގެންދިޔަ އެވެ. އެ ވަގުތު ރައީސްގެ ދެކަނބަލުންގެ އަރިހުގައި ނައިބް ރައީސް ހުސައިން މުހައްމަދު ލަތީފާއި ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމްވެސް ތިއްބެވި އެވެ.
ރައީސް މުއިއްޒު ބީޗަށް ވަޑައިގެންނެވިއިރު އެތައް ހާސް ބަޔަކު ދިޔައީ މަގުމަތީގައި ގައުމީ ދިދައާ އެކު ތިބެ ރައީސްއަށް ތާއީދުކުރާ ކަމަށް ބުނެ އަޑުއުފުލަމުންނެވެ.
ޕީއެންސީން ބުނާ ގޮތުގައި މިރޭގެ ޖަލްސާއަކީ ރާއްޖޭގައި މިހާތަނަށް އެންމެ ގިނަ ބަޔަކު ބައިވެރިވި ޖަލްސާ އެވެ.
ޕީއެންސީގެ މިރޭގެ ބޮޑު ޖަލްސާ ފައްޓަވަމުން ރައީސް މުއިއްޒު ވިދާޅުވީ، އެއީ ރާއްޖޭގެ ސިޔާސީ ހަޔާތުގައި އެންމެ ގިނަ ބަޔަކު ބައިވެރިވެގެން ބާއްވާ ބައްދަލުވުން ކަމަށެވެ.
އެ މަނިކުފާނު ވަނީ އެހާ ގިނަ ބަޔަކު މާލެއިންނާއި އެކި ރަށްރަށުން މިރޭގެ ޖަލްސާގައި ބައިވެރިވެފައިވާތީ ޝުކުރު އަދާކުރައްވައިފަ އެވެ.
މިރޭގެ އެއްވުމަށް ރާއްޖޭގެ އެކި ކަންކޮޅުތަކުން ޕީއެންސީގެ ސަޕޯޓަރުންނާއި ސިޔާސީ މަގާމުތަކުގައި ތިބި މީހުން އަދި ސަރުކާރުގެ ގިނަ އަދަދެއްގެ މުވައްޒަފުން ވަނީ މާލެ އައިސްފަ އެވެ.
