ކުންފުނިތަކަށް ސަރުކާރުން ނުދީ ހުރި ފައިސާ ކުރިއަށް އޮތް ފަސް ހަފުތާ ތެރޭފައި ދީ ނިންމާނެ ކަމަށް ރައީސް މުއިއްޒު ވިދާޅުވީ އޮކްޓޯބަރު މަހުގެ ކުރީކޮޅުއެވެ.
ސަރުކާރަށް ތާއީދު އޮތް މިންވަރު ދެއްކުމަށްޓަކައި ރޭ ޕީއެންސީން އާޓިފިޝަލް ބީޗުގައި ބޭއްވި ބޮޑު އެއްވުމެއް ވާހަކަ ދައްކަވަމުން ރައީސް މުއިއްޒު ވިދާޅުވީ މި ސާރުކާރުން އިގްތިސާދު ހަމައަކަށް އަޅުވަމުން ދަނީ މިދިޔަ ސަރުކާރުން ނުދީ "ފުނިޖައްސާފައި އޮތް" ބިލުތައް ވެސް ދައްކަމުން ކަމަށެވެ. އެގޮތުން ވައުދުވީ ގޮތަށް، މި މަހުގެ 6 ވަނަ ދުވަހުން ފެށިގެން އެ ބިލުތަކަށް ފައިސާ ދައްކަމުން އަންނަކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ މި ސަރުކާރުން ދައްކަމުން މި ދަނީ މިދިޔަ ސަރުކާރުން އެކި މަސައްކަތް ކުރުވާފައި، އޮޅުވާލާފައި އެކި ފަރާތްތަކަށް ދެރަ ދީފައި ހުރި ބިލުތަކަށް ކަމަށެވެ. އަދި އެ ފައިސާ މި ދައްކަނީ ވައުދުވެޑައިގެން ގޮތަށް ފައިސާ ޗާޕުނުކޮށްކަމަށްވެސް ރައީސް މުއިއްޒު ވިދާޅުވިއެވެ.
މިއަހަރުގެ ކުރީކޮޅު ގދ. ހޯޑެއްދޫގައި އެރަށު ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ދިވެހި ކޮންޓްރެކްޓަރުންނަށް ދޭންޖެހޭ 500 މިލިއަން ރުފިޔާ އޭރު އޮތްކަމަށެވެ. އެ ފައިސާ ހަފްތާގެ ތެރޭގައި ދައްކާނެ ކަމަށް އޭރު އެމަނިކުފާނު ވިދާޅުވެފައިވެއެވެ.
