މި އަހަރަށް އިއްވި ރިޔާސީ ބަޔާން އިއްވަމުން ރައީސް މުއިއްޒު ވަނީ 4،000 ފްލެޓް ލިބުނު އެްނމެން އެތަނަށް ވައްދާ ނިންމާނެކަމަށް ވިދާޅުވެ އޭރު ތާރީހެއް ދެއްވާފައެވެ.
އެހެންނަމަވެސް ރޭ މައްޗަންގޯޅި ރައްޔިތުންނާ ބައްދަލުކުރައްވައި ވާހަކަ ދައްކަވަމުން ރައީސް މުއިއްޒު ވަނީ ފްލެޓްތަކަށް މީހުން ވައްދާ ނިންމަން އަނެއްކާވެސް އާ ތާރީހެއް ދެއްވާފައެވެ. އެގޮތުން ރޭ ރައީސް މުއިއްޒު ވިދާޅުވީ 4،000 ފްލެޓް ލިބުނު އެންމެނަށް ފްލެޓްތައް ހަވާކޮށް ނިންމަން އަދި އަހަރެއްހާ ދުވަސް ނަގާނެކަމަށާއި 2027 ގެ ޖެނުއަރީގެ ކުރިން އެންމެނަށް ފްލެޓްތަކަށް ވަދެވޭނެކަމަށްވެސް ރައީސް މުއިއްޒު ވިދާޅުވިއެވެ. އަދި ފްލެޓް ލިބުނު މީހެއްގެ އަތުން ފްލެޓް އަތުލާފައި ނުވާނެކަމަށްވެސް ރައީސް ވިދާޅުވިއެވެ.
4000 ފްލެޓް ލިބުނު އެއްވެސް މީހެއްގެ އަތުން ފުލެޓް އަތުނުލާކަމަށް ރައީސް ވިދާޅުވިނަމަވެސް ކުރީ ސަރުކާރުން ނެރުނު ފްލެޓް ލިސްޓުގައި ތިބި ބައެއް މީހުންނަށް ފްލެޓް ނުލިބިގެން އެ ޝަކުވާތައް އަންނަނީ ކުރަމުންނެވެ.
4،000 ފްލެޓަށް ޝަރުތު ހަމަވާ މީހުންގެ ލިސްޓު މިއަހަރުގެ ފެބްރުއަރީ މަހުގެ ތެރޭގައި ނެރޭނެކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް އެ ލިސްޓު މިހާތަނަށްވެސް ނެރެފައެއް ނުވެއެވެ.
