ނޮވެމްބަރު މަހުގެ 25 ވަނަ ދުވަހު ފެށި މި ކެމްޕޭނުގައި، ހާއްސަކޮށް އަންހެނުންނާއި އަންހެންކުދިންނަށް އަމާޒުވާ ހަށިގަނޑާނީ އަދި ޑިޖިޓަލް އަނިޔާތަކާ ބެހޭގޮތުން މުޖުތަމައު ހޭލުންތެރިކުރުމުގެ ހަރަކާތްތަކެއް ކުރިއަށް ގެންދާނެ އެވެ.
މި މުނާސަބަތާ ގުޅިގެން ރައީސުލްޖުމްހޫރިއްޔާގެ އޮފީހުން ނެރުނު ބަޔާނެއްގައި، ރާއްޖޭގެ ކޮންމެ އަންހެނަކާއި އަންހެން ކުއްޖަކަށް ގޭތެރޭގަ އާއި، ވަޒީފާގެ މާހައުލުގަ އާއި، މުޖުތަމައުގެ ތެރޭގައި އަދި އޮންލައިންކޮށްވެސް އަނިޔާއިން ރައްކާތެރިވެގެންވާ މާހައުލެއް ގާއިމްކޮށްދިނުމަށް ސަރުކާރުން އިސްކަންދޭކަމުގެ ޔަގީންކަން ވަނީ ދީފަ އެވެ. ރައީސް ޑރ. މުހައްމަދު މުއިއްޒު ވިދާޅުވީ، ޓެކްނޮލޮޖީގެ ސަބަބުން ޑިޖިޓަލް އަނިޔާގެ ނުރައްކާ ބޮޑުވަމުން އަންނަ ކަމަށާއި، އޮންލައިންކޮށް ދިމާވާ ފުރައްސާރަ އާއި ކުރުން ފަދަ ކަންކަމުން މުޖުތަމައު ހިމާޔަތްކުރުމަށް އެންމެން ގުޅިގެން މަސައްކަތް ކުރަންޖެހޭ ކަމަށެވެ.
ސަރުކާރުގެ މި އަޒުމް ހަގީގަތަކަށް ހެދުމަށްޓަކައި ގާނޫނީ ގޮތުންވެސް މުހިންމު ފިޔަވަޅުތަކެއް އަޅާފައިވާކަން ފާހަގަކޮށްފައިވެ އެވެ. އެގޮތުން، ސައިބަކްރައިމް އަދި ޑިޖިޓަލް އަނިޔާގެ މައްސަލަތައް ހައްލުކުރުމަށް ގާނޫނުލްއުގޫބާތަށް ހަ ވަނަ އިސްލާހު ގެނެސްފައިވެ އެވެ. މީގެ އިތުރުން، ޓެކްނޮލޮޖީ ބޭނުންކޮށްގެން ދޭ އަނިޔާތަކާ ދެކޮޅަށް މަސައްކަތްކުރުމުގެ އިންޓަނޭޝަނަލް އެއްބަސްވުމެއް ކަމަށްވާ އދ. ގެ ކޮންވެންޝަން އެގެއިންސްޓް ސައިބާ ކްރައިމްގައި ވެސް ރާއްޖެއިން ވަނީ ސޮއިކޮށްފަ އެވެ. ރައީސް ވިދާޅުވީ ހަމައެކަނި ގާނޫނުތަކުން މިކަން ހައްލުނުވާނެ ކަމަށާއި، އަންހެނުންގެ ރައްކާތެރިކަން ކަށަވަރުކުރުމަށް މުޅި މުޖުތަމައުގެ ވިސްނުން ބަދަލުކޮށް، ހޭލުންތެރިކުރުވުން މުހިންމު ކަމަށެވެ.
