މިނިސްޓަރު ސައީދު މިހެން ވިދާޅުވީ، ގަވާއިދާ ހިލާފަށް ބިދޭސީން ހިންގާ ވިޔަފާރިތަކާ ދެކޮޅަށް ހަރުކަށި ފިޔަވަޅު އަޅަން ސަރުކާރުން ނިންމާފައިވާކަން ފާހަގަކުރައްވައި އެކްސްގައި ކުރެއްވި ޕޯސްޓެއްގައެވެ.
މިނިސްޓަރު ވިދާޅުވި ގޮތުގައި، މިއީ ރައްޔިތުންގެ ވަރަށް ބޮޑު ކަންބޮޑުވުމެއް އޮތް ޒަމާންވީ މައްސަލައެކެވެ. އެހެންކަމުން، މިފަދަ ވިޔަފާރިތައް ދެނެގަނެ އެކަން ރިޕޯޓްކުރެވޭނެ އިންތިޒާމެއް ހަމަޖެއްސުމަކީ ސަރުކާރުގެ މަސައްކަތަށް ލިބުނު އިތުރު ބާރެކެވެ. އަދި މިފަދަ ކޮންމެ މައްސަލައެއްވެސް ހައްލުކުރެވޭނީ ސަރުކާރާއި ރައްޔިތުން ގުޅިގެން މަސައްކަތްކޮށްގެން ކަމަށްވެސް އޭނާ ވިދާޅުވިއެވެ.
ބިދޭސީން ނުގަވާއިދުން ހިންގާ ވިޔަފާރިތައް ހުއްޓުވުމަށް މި ސަރުކާރުން ވަނީ ގާނޫނީ ބާރުވެރިކަން އިތުރުކޮށްފައެވެ. އެގޮތުން 46 އަހަރު ވެފައިވާ ފޮރިން އިންވެސްޓްމަންޓް ގާނޫނު އުވާލައި، މާޒީގެ ތަޖުރިބާތަކުގެ އަލީގައި މައްސަލަތައް ހައްލުކުރެވޭނެފަދަ ހަރުދަނާ އާ ގާނޫނެއް ވަނީ އެކުލަވާލާފައެވެ. މިނިސްޓަރު ވިދާޅުވީ، އަންނަ ހަފުތާއިން ފެށިގެން މި މަސައްކަތް ހަލުއިވެ، ރަނގަޅު ނަތީޖާތަކެއް ފެންނަމުންދާނެ ކަމަށެވެ.
