މަޖިލީހުގައި މި ބިލަށް ބަހުސްކުރައްވަމުން އޭނާ ވިދާޅުވީ މި އިސްލާހު އޮތް ގޮތުން މުޒާހަރާކުރުން ފަދަ ހައްގުތަކުގެ ބޭނުންކުރާ ހާލަތްތަކުގައި ވެސް ލައިސަންސް ބާތިލް ކުރުމުގެ ފުރުސަތު އޮތް ކަމަށެވެ.
މި އިސްލާހާ ގުޅޭގޮތުން ވާހަކަދައްކަވަމުން އެމްޑީޕީގެ ޕީޖީ ލީޑަރު ނާޒިލް ވިދާޅުވީ، ދަތުރުފަތުރުގެ ގާނޫނު ނޫން އެހެން ގާނޫނަކާ ހިލާފުވެއްޖެ ނަމަ ލައިސަންސް ހިފެހެއްޓުމާއި ބާތިލްކުރުމުގެ ބާރު އިދާރާތަކަށް ދިނުމަކީ ބަލައިގަނެވޭނެ ކަމެއް ނޫން ކަމަށެވެ.
މި އިސްލާހުގައިވާ ގޮތުން، ލައިސަންސް ލިބިފައިވާ ފަރާތުން އަމަލުކުރަން ޖެހޭ އެހެން ގާނޫނަކާ ހިލާފުވުން ވެސް ބެލެވޭނީ ލައިސަންސް ހިފެހެއްޓިދާނެ ނުވަތަ ބާތިލް ކުރެވިދާނެ ސަބަބެއްގެ ގޮތުގަ އެވެ. ނާޒިލް ވިދާޅުވީ ދުއްވުމުގެ ގަވައިދާ ހިލާފުވުމާއި އެހެނިހެން ކަންކަން ވަކިކުރަން ޖެހޭނެ ކަމަށާއި، ކޮމިޓީ މަރުހަލާގައި މި ކަންކަމަށް ހައްލު ހޯދައި އިސްލާހު ގެންނަން ޖެހޭ ކަމަށެވެ. އަދި އާންމު ހިދުމަތެއްގެ ގޮތުގައި ކުރާ ދަތުރުފަތުރުގެ ކަންކަމާ ގުޅޭ އުސޫލުތައް މީހުންނަށް އުނދަގޫ ނުވާނެހެން ބައްޓަން ކުރުމަށް ވެސް އޭނާ ގޮވާލެއްވި އެވެ.
