ލަންކާގެ އިދާރާތަކާ ހަވާލާދީ އަލްޖަޒީރާއިން ބުނީ މިދިޔަ ހަފްތާއިން ފެށިގެން ލަންކާގެ މޫސުން ގޯސްވެ ކުރަމުންދާ ވިއްސާރައިގައި މިހާތަނަށް 136 މީހުން މަރުވެ 600 އަށްވުރެ ގިނަ ގެއަށް ގެއްލުންތަކެއް ލިބި، ބައެއް މީހުން ގެއްލިގެން ހޯދަމުންދާ ކަމަށެވެ.
ވިއްސާރައިގެ ސަބަބުން ލަންކާއަށް ބޮޑެތި ގެއްލުންތަކެއް ދަނީ ލިބެމުންނެވެ. އެގޮތުން ގެތަކުގެ އިތުރުން ދަނޑުބިންތަކާއި މަގުތައް ވެސް ދަނީ ހަލާކުވަމުންނެވެ.
ލަންކާއަށް ކުރަމުންދާ ވިއްސާރައިގައި ފެންބޮޑުވެ ބައެއް ކޯރުތައް ވެސް ވަނީ ބަންޑުންވެފަ އެވެ. އޭގެ ސަބަބުން މަގުތައް ބްލޮކްވެ މީހުން ސަލާމަތް ކުރުމަށް ވެސް ދަނީ ދަތިތައް ކުރިމަތިވަމުންނެވެ.
ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން ބުނީ މޫސުން ގޯސްވުމުގެ ސަބަބުން މިހާތަނަށް 15،000 އަށް ވުރެ ގިނަ ގެދޮރު ހަލާކުވެ، 78،000 އަށް ވުރެ ގިނަ މީހުން ވަގުތީ ހިޔާތަކަށް ދާން މަޖުބޫރުވެފައިވާ ކަމަށެވެ.
ފުލުހުންނާއި ޑިޒާސްޓާ މެނޭޖްމަންޓް ސެންޓަރ (ޑީއެމްސީ)ގެ ޓީމުތަކާއި ވޮލަންޓިއަރުން ދަނީ އެއްވެސް ހަބަރެއް ލިބިފައިނުވާ ސަރަހައްދުތަކަށް ވާސިލްވުމަށް 24 ގަޑިއިރު އޮޕަރޭޝަންތައް ހިންގަމުންނެވެ. ފެނުގެ ސަބަބުން ގެތަކުގައި ތާށިވެފައިވާ އެތަށް ހާސް ބަޔަކުވެސް ހިމެނޭއިރު އެމީހުން ރައްކާތެރި ތަންތަނަށް ގެންދިޔުމުގެ ބުރަ މަސައްކަތް ކުރަނީ ލަންކާ ސިފައިންނެވެ. މިކަމުގައި 20 ހާހަށްވުރެ ގިނަ ސިފައިން ހަރަކާތްތެރިވާ ކަމަށް ލަންކާ ނޫސްތަކުން ރިޕޯޓް ކުރެ އެވެ.
ކަމާބެހޭ ފަރާތްތަކުން ބުނެފައިވަނީ ފެންގަނޑު ހިނދި، ވަދެވެން ނެތް ސަރަހައްދުތަކަށް ވާސިލްވެވުމުން ގެއްލުން ލިބިފައިބާ މީހުންގެ އަދަދު އިތުރުވެދާނެ ކަމަށް ބެލެވޭ ކަމަށެވެ.
އާންމު ދިރިއުޅުމަށް އަސަރު ކުރުމުގެ ސަބަބުން ލަންކާ ސަރުކާރުން ވަނީ އެ ގައުމުގެ ސްކޫލްތަކާއި އޮފީސްތައް ވެސް ބަންދުކޮށްފަ އެވެ. އޭގެއިތުރުން ޓްރެއިން ސްޓޭޝަންތައް ވެސް ވަނީ ބަންދުކޮށްފަ އެވެ.
މޫސުމާބެހޭ ސްރީލަންކާގެ އިދާރާ (މިޓިއޮރޮލިޖިކަލް ޑިޕާޓްމަންޓް) އިން ނެރުނު ބަޔާނެއް ބުނާގޮތުން ތޫފާންގެ ދިތުވާ ސްރީލަންކާގެ ބައްރު ހުރަސްކުރުމަށްފަހު މިހާރު އެގައުމުގެ އިރުމަތީ އައްސޭރިފަށް ދޫކޮށް އިންޑިއާގެ އިރުދެކުނަށާއި ބޭ އޮފް ބެންގޯލްއަށް ގޮސްފައިވީނަމަވެސް އެ ތޫފާންގެ އަސަރު އަދިވެސް ސްރީލަންކާއަށް ދަނީ ކުރަމުންނެވެ.
