އޭނާ މިކަމަށް އެދިވަޑައިގަތީ ކައުންސިލް އިންތިހާބުގެ ޕްރައިމަރީއާ ގުޅޭގޮތުން މައުލޫމާތު ދިނުމަށް މިއަދު މީޑިއާތަކާ ބައްދަލުކުރައްވައި ވާހަކަދައްކަވަމުންނެވެ.
މެމްބަރު ފަލާހް ވިދާޅުވި ގޮތުގައި މި ސަރުކާރުން ރައީސް މުއިއްޒުގެ އިސްނެންގެވުމާއެކު ރާއްޖޭގެ އެކި ކަންކޮޅުތަކުގައި ގިނަ އަދަދެއްގެ ތަރައްގީގެ މަޝްރޫއުތައް ވަނީ ފަށައިފައެވެ. މި މަޝްރޫއުތައް އަވަހަށް ނިންމައި ރައްޔިތުންނަށް އޭގެ މަންފާ ހޯދައިދިނުމަށްޓަކައި ސަރުކާރުގެ ސިޔާސަތުތަކަށް އެއްބާރުލުންދޭ ކައުންސިލަރުން ތިބުމަކީ މުހިންމު ކަމެއް ކަމަށް ފަލާހް ފާހަގަކުރެއްވިއެވެ. އަދި މިފަހަރުގެ ކައުންސިލް އިންތިހާބު ވެގެންދާނީ އެއް ޕާޓީއަކަށް ސިޔާސީ ގޮތުން އެންމެ ބޮޑު ކާމިޔާބީއެއް ލިބޭނެ އިންތިހާބަށް ކަމުގެ ޔަގީންކަން އެބައޮތް ކަމަށް ވެސް އޭނާ ވިދާޅުވިއެވެ.
ޕީއެންސީގެ ޓިކެޓުގައި އިންތިހާބުގައި ވާދަކުރަން ބޭނުންވާ ފަރާތްތަކަށް ޕްރައިމަރީގައި ބައިވެރިވުމުގެ ފުރުސަތު މާދަމާއިން ފެށިގެން ހުޅުވާލަން އެ ޕާޓީން ވަނީ ނިންމައިފައެވެ. ޑިސެމްބަރު މަހުގެ 15 ވަނަ ދުވަހުގެ ނިޔަލަށް މި ފުރުސަތު ހުޅުވާލާފައިވާއިރު، ކުރިމަތިލެވޭނީ ޕާޓީގެ ވެބްސައިޓުގައި އޮންނަ އޮންލައިން ފޯމެއް މެދުވެރިކޮށެވެ. މި ޕްރައިމަރީގައި ވާދަކުރެވޭނީ މިވަގުތު ޕީއެންސީގެ މެމްބަރުންގެ ގޮތުގައި ދަފުތަރުގައި ތިބި މީހުންނަށް ކަމަށް އެ ޕާޓީން މައުލޫމާތު ދެއެވެ.
