މަސްވެރިންގެ ދުވަސް ފާހަގަކުރުމުގެ ގޮތުން ރ. ދުވާފަރުގައި ފެށި "މަސްވެރިންގެ ގުންޒަރު"ގައި ވާހަކަދައްކަވަމުން މިނިސްޓަރު ވިދާޅުވީ، ރާއްޖޭގެ މަސްވެރިކަން ބައްޓަންވެފައި އޮންނަނީ ސަރުކާރުގެ އެހީތެރިކަން ލިބޭ ގޮތަށް ކަމަށެވެ.
މިހާރު ހުރި ގޮންޖެހުންތަކާ އެކުވެސް ސަރުކާރުގެ އަމާޒަކީ މަސްވެރިންނަށް ހައްލު ހޯދައިދިނުން ކަމަށް އޭނާ ވިދާޅުވިއެވެ.
މިނިސްޓަރު އިތުރަށް ވިދާޅުވީ މަސްވެރިކަމުގެ ސިނާއަތުގައި ހުރީ ވަރަށް ޒަމާންވީ މައްސަލަތަކެއް ކަމަށާއި، މި ކަންކަން ހައްލު ކުރުމަށް ވަގުތާއި ބޮޑު ހޭދައެއް ބޭނުންވާ ކަމަށެވެ. ދުވާފަރުގައި ކުރިއަށްދާ މި ބައްދަލުވުމަކީ މަސްވެރިންނަށް ހުރި ދަތިތަކާ މެދު މަޝްވަރާކުރުމަށް ބޭއްވޭ މުހިންމު ހަރަކާތެއްކަން ފާހަގަކުރައްވައި، ރައީސް ޑރ. މުހައްމަދު މުއިއްޒުގެ ވެރިކަމުގެ މި ފަސް އަހަރުގެ ތެރޭގައި މަސްވެރިކަމުގެ ދާއިރާއަށް ވެވަޑައިގެންފައިވާ ވައުދުތައް ފުއްދަވާނެ ކަމުގެ ޔަގީންކަން މިނިސްޓަރު ވަނީ ދެއްވާފައެވެ.
