ހާއްސަ ހާލަތްތަކުގައި އެ މީހެއްގެ ޕެންޝަން ފަންޑުން އެމީހަކަށް ފައިސާ ނެގޭ ގޮތަށް ގާނޫނު ބަދަލު ކުރައްވާނެކަން ރައީސް މުއިއްޒު އިއުލާންކުރެއްވީ ހެންވޭރު ރައްޔިތުންނާއި އެކު މިމަހުގެ 8 ވަނަދުވަހުގެ ރޭ ބޭއްވި ބައްދަލުވުމުގައެވެ.
ރޭ ގަލޮޅު ރައްޔިތުންނާއި ބައްދަލުކުރައްވާ ވާހަކަ ދައްކަވަމުން ރައީސް މުއިއްޒު ވިދާޅުވީ ޕެންޝަން ފަންޑުން އިތުރު ކަންކަމަށް ފައިސާ ބޭނުންކުރެވޭ ގޮތަށް ގާނޫނު އިސްލާހު ކުރާއިރު ބައެއް ހާލަތުގައި އެއްކޮށް ފައިސާ ނެގޭ ގޮތަށް ގާނޫނަށް ބަދަލު ގެންނާނެކަމަށެވެ. އެގޮތުން ބޮޑެތި ބަލިތަކަށް ފަރުވާ ކުރާ މީހުންނަށް ޕެންޝަން ފައިސާ އެއްކޮށް ނެގޭ ގޮތް ހަދަން ނިންމާފައިވާކަމަށް ރައީސް މުއިއްޒު ވިދާޅުވިއެވެ.
ޕެންޝަން ފަންޑުން މިވަގުތު ފައިސާ ނެގެނީ ބޯހިޔާވަހިކަމާއި ހައްޖަށް ދިޔުމަށް އެކަންޏެވެ. އެވެސް ނެގެނީ ވަކި ވަރެއް ހަމަވުމުންނެވެ.
