އެ އިދާރާ އިން ކައުންސިލްތަކަށް ފޮނުވި ސިޓީއެއްގައި ބުނީ، ބިމާއި ފްލެޓަށް ކުރިމަތިލުމަށްޓަކައި، އެ މީހަކީ މާލޭގައި ދިރިއުޅޭ މީހެއްކަން އަންގައިދޭ ލިޔުން ހޯދުމަށް އެކި ފަރާތްތަކުން ކައުންސިލުތަކަށް ހުށަހަޅަމުންދާތީ އެފަދަ ލިޔުމެއް ކައުންސިލުން ދޫކުރުމާ މެދު ކައުންސިލުތަކުން އެލްޖީއޭގެ ލަފަޔަކަށް އެދެމުން އަންނަ ކަމަށެވެ.
ހައުސިން މިނިސްޓަރު ޑރ.އަބްދުﷲ މުއްތަލިބު ދައުލަތުގެ މީޑިޔާ ޕީއެސްއެމްއަށް މިފަހުން ދެއްވި ބަސްދީގަތުމެއްގައި ވިދާޅުވެފައިވަނީ މީހަކު މާލޭގައި 15 އަހަރު ދިރިއުޅުނުކަން ބަޔާންކޮށް ކައުންސިލުތަކުގެ ރައީސަށް ލިޔުން ދޫނުކުރެވޭނެ ކަމަށެވެ.
މުއްތަލިބު އިތުރަށް ވިދާޅުވި ގޮތުގައި މާލޭގައި 15 އަހަރު އުޅުނު ކަމަށް ބުނާ ލިޔުން ހުށަހެޅުމުގައި މި ސަރުކާރުން ލުއިތަކެއް ދީފައި ހުންނާނެ އެވެ. ވަަޒީފާއެއްގައި އުޅުނު ކަމުގެ ލިޔުން ނުވަތަ އާއިލާއެއް ބިނާކުރި ކަމުގެ ރަސްމީ ލިޔެކިޔުމެއް ނެތް ނަމަ އެ އުޅުނު ގެއެއްގެ ވެރިފަރާތެއްގެ ލިޔުން ހުށަހެޅިދާނެ ކަމަށް މުއްތަލިބު ވިދާޅުވި އެވެ.
އެކަމަކު އެ ލިޔުމަކީ ގާނޫނީ ލިޔުމަކަށް ވާންޖެހޭނެ ކަމަށާއި އެއީ ނޮޓަރައިޒްޑް ކޮށްފައިވާ ލިޔުމަކަށް ވާން ޖެހޭ ކަމަށް މިނިސްޓަރު ވިދާޅުވި އެވެ.
އެލްޖީއޭއިން ބުނީ، މީގެ ކުރިން ބައެއް ކައުންސިލްތަކުން، ސާބިތުނުކުރެވޭ ގޮތަށް ނުވަތަ ދޮގު މައުލޫމާތު ހިމަނައިގެން އެ ފަދަ ލިޔުން ދޫކޮށްފައިވާތީ، އެ ލިޔުން، ދޫކުރުމުގައި، ޒިންމާވާ ފަރާތްތަކުގެ މައްސަލަ ބަލައި ފިޔަވަޅު އެޅުމުގެ މަސައްކަތް ކަމާ ގުޅުންހުރި އިދާރާތަކުން ކޮށްފައިވާ ކަމަށެވެ.
އެލްޖީއޭއިން މިހެން އެންގިއިރު، އެ ކައުންސިލުން މީގެ ކުރިން ބެލެހެއްޓި މައުލޫމާތުތަކަކަށް ނުވާތީ، މި ސަރުކާރުގެ ފްލެޓާއި، ގޯތީގެ ސްކީމަށް ކުރިމަތިލާ ގދ. މަޑަވެލީ ރައްޔިތުންނަށް އެ މީހަކީ މާލޭގައި ދިރިއުޅެމުން އައި މީހެއްކަން އެނގޭފަދަ ލިޔުމެއް ދެވެން ނެތްކަމަށް އެ ރަށު ކައުންސިލުން ބުނެފަ އެވެ.
ރަށު ކައުންސިލުތަކުންދޭ ލިޔުންތައް ބަލައިނުގަންނަން މި ސަރުކާރުން ނިންމާފައި ވަނީ ގެދޮރުވެރިޔާ ސްކީމުން ދޫކުރި ފްލެޓްތަކަށް ޝަރުތު ހަމަކުރަން މާލޭގައި 15 އަހަރު އުޅުނު ކަމަށް ދޮގު ލިޔުންތައް ކުރީގެ ކައުންސިލުތަކުން ދިން ކަމަށް ތުހުމަތުކޮށެވެ. އެ މައްސަލަ އޭރު އޭސީސީން ވެސް ބެލި އެވެ.
