އެމްޓީސީސީން ބުނީ ބޮޑުމަގުގެ ދެވަނަ ބައިގެ ޝީޓް ޕައިލިން މަސައްކަތް އެއްކޮށް ނިންމާލާފައިވާކަމަށެވެ. އެގޮތުން 260 މީޓަރުގެ ސަރަހައްދެއްގައި ވަނީ ޝީޓް ޕައިލްކޮށްފައެވެ.
މީގެ އިތުރުން 105 މީޓަރުގެ ކުއޭ ވޯލް ކެޕިން ކޮންކްރީޓް މަސައްކަތް ނިމިފައިވާކަމަށާއި ބިން ހިއްކުމުގެ މަސައްކަތުގެ 65 އިންސައްތަ މަސައްކަތް ނިމިފައިވާ ކަމަށް ވެސް އެމްޓީސީސީން ބުނެއެވެ. މީހުންނަށް ހާއްސަ ކޮށްގެން ހަދާ ލޭން ޕޭވް ކުރުމުގެ މަސައްކަތް ވަރަށް ބާރަށް ކުރިޔަށް އެބަދާ ކަމަށާއި ފަހަނާ ހޮޅި އާއި ފެން ހޮޅި އެޅުމުގެ މަސައްކަތް މިހާރު 50 އިންސައްތަ ނިމިފައިވާ ކަމުގައިވެސް އެމްޓީސީސީން ބުނެއެވެ.
ބޮޑުތަކުރުފާނުމަގުގެ ފުޅާކޮށް ތަރައްގީކުރުމުގެ މަޝްރޫއުގެ ދަށުން ބާޒަރުމަތީމަގު ފުޅާކުރުމުގެ އަމަލީ މަސައްކަތް ފަށާފައިވަނީ މިދިޔަ އަހަރުގެ ޑިސެމްބަރު މަހުގެ 9 ވަނަ ދުވަހު އެވެ.. އެ ސަރަހައްދުގެ މަސައްކަތް ނިންމާ އަންނަ ރޯދަމަހުގެ ކުރިން ހުޅުވާލާނެކަމަށް މިނިސްޓަރު މުއްތަލިބު ވަނީ ވިދާޅުވެފައެވެ. އަންނަ ރޯދަ މަސް ފެށޭނީ އަންނަ ފެބްރުއަރީ މަހުގެ 18 ވަނަ ދުވަހު އެވެ.
މި މަޝްރޫއުގެ އަގަކީ 144،509،024.16 ރުފިޔާއެވެ.
