ހދ. ކުޅުދުއްފުށީ ރީޖަނަލް ހޮސްޕިޓަލްގައި ޕްރައިވެޓް ރޫމް، ފެސިލިޓީއެއް އެޅުމަށް އަލްޓެކް މޯލްޑިވްސް ޕްރައިވެޓް ލިމިޓެޑްއާއި ހަވާލުކޮށްފި އެވެ.
Advertisement
ހެލްތު މިނިސްޓްރީގެ ފަރާތުން އެ އެއްބަސްވުމުގައި ސޮއިކުރެއްވީ ސްޓޭޓް މިނިސްޓަރު ހަދީޖާ ޢަބްދުއްސަމަދު އަބްދުﷲ އެވެ. އަދި އަލްޓެކް މޯލްޑިވްސްގެ ފަރާތުން ސޮއި ކުރެއްވީ ޖެނެރަލް މެނޭޖަރު ހުސައިން ތަސްމީނެވެ.
މިމަސައްކަތް ހަވާލުކޮށްފައިވަނީ 53 މިލިއަން ރުފިޔާއަށް 435 ދުވަހުގެ ތެރޭގައި ނިންމާ ގޮތަށެވެ.
މި މަސައްކަތަށް ފަންޑުކޮށްފައިވަނީ އޭޝިއަން އިންފްރާސްޓްޗާ އިންވެސްޓްމަންޓް ބޭންކް (އޭއައިއައިބީ) އިންނެވެ. މިއީ މި ބޭންކްއިން ރާއްޖޭގައި ކުރިއަށްގެންދާ ފުރަތަމަ ސްޓޭންޑް އެލޯން ޕްރޮޖެކްޓެވެ،
ހެލްތު މިނިސްޓްރީން ބުނިގޮތުގައި މިއަދު ސޮއިކުރެވުނު އެއްބަސްވުމުގެ ދަށުން ގާއިމްކުރެވޭ މި ފެސިލިޓީގައި 14 ޕްރައިވެޓް ރޫމް ހުންނާނެ އެވެ. މި 14 ކޮޓަރި ހުންނާނީ ބަލިމިހާގެ އިތުރަށް ބަލިމީހާގެ އެހީތެރިއާއިއެކު ހުރެވޭ ގޮތަށެވެ.
ކުޅުދުއްފުށީ ރީޖަނަލް ހޮސްޕިޓަލަކީ، މާލޭގެ ހޮސްޕިޓަލްތައް ފިޔަވައި އެންމެ ގިނަ ބަޔަކަށް ފަރުވާދޭ އެއް ހޮސްޕިޓަލެވެ. ހއ، ހދ.އަތޮޅުގެ އިތުރުން ށ.އަތޮޅުގެ ރައްޔިތުންވެސް މި ހޮސްޕިޓަލުން ފަރުވާ ހޯދައެވެ. މިހޮސްޕިޓަލުގައި މިހާރުވެސް 700އެއްހާ މުވައްޒަފުން މަސައްކަތް ކުރެއެވެ.
މިނިސްޓްރީން ބުނީ އެ ފެސިލިޓީގެ މަސައްކަތް ނިމުމުން ރަށްރަށުން އެ ހޮސްޕިޓަލަށް ހިދުމަތް ހޯދަން ދާ މީހުންނަށް ވަރަށް ބޮޑު ލުއިފަސޭހައެއް ލިބޭނެ ކަމަށެވެ. އަދި ގައިން ގަޔަށް އަރާ ބަލީގެ ޕޭޝަންޓުން ވަކިން އައިސޮލޭޓްކޮށް، ހޮސްޕިޓަލުގެ އާންމު ހިދުމަތަށް ބުރޫނާރައި ހިދުމަތް ދެވޭނެ ކަމަށް މިނިސްޓްރީން ބުންޏެވެ.
