އިދިކޮޅު އެމްޑީޕީން މިހެން ބުނެފައިވަނީ މިއަދު ޓްވީޓާގައި ކުރި ޕޯސްޓެއްގައި އެވެ.
އެ ޕޯސްޓުގައި އެމްޑީޕީން ވަނީ މިކަމުގެ ސަބަބުން ނުހަނު ބޮޑެތި ދަތިތަކާ ކުރިމަތިވަމުން އެބަދާ ކަމަށް ބުނެފައި އެވެ.
ދައުލަތުގެ އިދާރާތަކުން ރިކޯޑް ސާފުކުރުމާއި އެހެނިހެން ކަންކަން ފުރިހަމަކުރުމަށް އެތަކެއް ދުވަހެއް ނަގާކަމަށާއި މިހުރިހާ ކަމަށް ބަލާ އިރު މިއީ އެންމެ އެކަށީގެންވާ ވަރުގެ ވަގުތެއް ނޫން ކަމަށް އެމްޑީޕީން ފާހަގަ ކުރި އެވެ.
މިކަމުގެ ސަބަބުން އެތައް ބަޔަކަށް އިންތިހާބަށް ކުރިމަތިލުމުގެ ފުރުސަތު ގެއްލިދާނެކަމުގެ ކަންބޮޑުވުން ވަރަށް ގިނަ ބަޔަކުދަނީ ފާޅުކުރަމުން ކަމަށް އެމްޑީޕީން ބުނެ އެވެ.
އެ މައްސައަށް ހައްލު ހޯދައިދިނުމަށް އިލެކްޝަންސް ކޮމިޝަނަށް އެމްޑީޕީން ގޮވާލި އެވެ.
އީސީގެ ތެރެއިން އިންތިހާބަށް ނުފޫޒު ފޯރުވަމުން އެބަދޭ ކަމަށް އިދިކޮޅު މައި ޕާޓީ އެމްޑީޕީން ވަނީ ކުރިން ބުނެފައި އެވެ.
އެމްޑީޕީގެ ވިލިގިލީ ދާއިރާގެ ރައީސް ހުސެއިން ހަސަން ވިދާޅުވީ އީސީގެ ތެރެެއިން އަމިއްލައަށް ކުރިމަތިލާ ކެނޑިޑޭޓުންނައް އަމިއްލަ ގޮތުން ކުރިމަތިލާ ކެންޑިޑޭޓުންނަށް ތާއީދުކޮށް އީފާސް މެދުވެރިކޮށް ތާއީދު ދިނުމުން އެ މައުލޫމާތު ވަގުތުން ޕީއެންސީއަށް ދޭ ކަމުގައި އެެވެ.
މީގެ އިިތުރުން ކެންޑިޑެންސީ ފޯމު ހުށަހެޅުމަށް މިފަހަރު ހުޅުވާލާފައިވާ ޕޯޓަލް އަށް ވެރިކަންކުރާ ޕީއެންސީއަށް އެކްސެސް އޮތް ކަމަށް އޭނާ ވަނީ ތުހުމަތު ކުރައްވާފައި އެވެ.
އޭނާ އިތުރަށް ވިދާޅުވީ އީސީ އާއި ޕީއެންސީ އާއި ދެމެދު ސިއްރު ބައްދަލުވުންތަކެއް ބާއްވާފައިވާ ކަމަށާއި އެއީ އެއްގޮތަކަށް ގަބޫލު ކުރެވޭނެ ކަމެއް ނޫން ކަމުގައި އެވެ.
އޭނާ ފާހަގަ ކުރެއްވި ގޮތުގައި އެމްޑީޕީން ކުރިމަތިލާ ކެންޑިޑޭޓުންގެ ކެންޑިޑޭންސީ އާއި ގުޅިގެން ގޮތެއް ނިންމުމަށް އެ ކޮމިޝަން ފަސް ދުވަސް ނަގާކަމަށާއި އެ ކަމުގެ ސަބަބުން ރަނގަޅު ކުރަންޖެހޭ ބައިތައް ރަނގަޅުކޮށްގެން އަލުން ލާން ލިބޭ ވަގުތުތައް ވަރަށް ބޮޑަށް ކުޑަ ވެގެން ދާނެ ކަމުގައި އެވެ.
