އެ ރަށު ކައުންސިލްގެ ރައީސް އަހުމަދު ރައިސަމް "ސީއެންއެމް" އަށް މިއަދު ވިދާޅުވީ ރަށުން ބޭރުގައި ދިރިއުޅޭ މީހެއްކަން ކަނޑައެޅުމަށާއި ދިރިއުޅުނު މުއްދަތު ކަނޑައަޅާނީ އެ އިދާރާއަށް ހުށަހަޅާ ލިޔުންތަކަށް ބެލުމަށް ފަހު ކަމުގައި އެވެ.
ރަށުގައި ދިރިނޫޅޭކަން އަންގައިދިނުމަށް ހުށަހެޅިދާނެ ލިޔުންތަކެއް ވެސް އިއުލާނުގައި ބުނެފައިވެ އެވެ.
އޭގެ ތެރޭގައި، ވަޒީފާދޭ ފަރާތަކުން ޕެންޝަން ސްކީމަށް ދޫކޮށްފައިވާ ލިޔުން ހުށަހަޅަން ޖެހެ އެވެ. އެ ލިޔުމުގައި، ވަޒީފާ އަދާކުރަން ފެށި ތާރީހާއި ލިޔުން ދޫކުރި ފަރާތުގެ ނަމާއި ސޮޔާއި ސިއްކަ ޖަހާފައި އޮންނަން ޖެހެ އެވެ.
ހުށަހަޅަންޖެހޭ އިތުރު ލިޔުންތަކުގެ ތެރޭގައި ހިމެނެނީ ދިރިއުޅޭ ރަށުގެ ތައުލީމީ މަރުކަޒަކުން ތައުލީމު ހާސިލުކޮށްފައިވާކަން އެނގޭނެ ލިޔުމާއި ދައުލަތުގެ އިދާރާއަކުން އެ އިދާރާއިން ރަސްމީކޮށް ބަލަހައްޓާ ލިޔެކިޔުންތަކުގެ މައުލޫމާތުން، އެ ރަށެއްގައި ދިރިއުޅެފައިވާ މުއްދަތު ސާބިތުވާކަމުގެ ލިޔުމެވެ.
ފޭދޫ ކައުންސިލުން ބުނީ މިހާރު ދިރިއުޅެމުންދާ ރަށުގައި އުޅޭކަން ސާބިތުކޮށްދިނުމުގެ ގޮތުން ޕަބްލިކް ނޯޓަރީއެއްގެ ކުރިމަތީގައި ހުވައެއްކޮށް، އެމީހަކު އެ ރަށެއްގައި ދިރިއުޅެފައިވާ ގޭގެ ވެރިފަރާތުން ދީފައިވާ ނޮޓޮރައިޒްކޮށް ހުށަހަޅާ އެފިޑެވިޓެއް ހުށަހަޅަން ޖެހޭ ކަމަށެވެ.
ކައުސިލުން އިތުރަށް ވިދާޅުވިގޮތުގައި އެ ދަފްތަރު އެކުލަވާލާފައިވަނީ ގޯއްޗަށް އަދި ފްލެޓް އެދި ހުށަހަޅާއިރު ކައުންސިލްގެ ފަރާތުން ރަށުގައި ނޫޅޭ ކަމުގެ ލިއުން ދޭން ޖެހޭތީ އެ ލިއުން ދިނުމަށް ފަސޭހަ ކުރުމުގެ ގޮތުން ކަމުގައި އެވެ.
ރައިސަމް އިތުރަށް ވިދާޅުވީ އެލިޔުން ކައުންސިލުން ދޫކުރަނީ އެލްޖީއޭއިން ގަބޫލު ކުރާ ފަދަ ލިޔުމެއް ހުށަހެޅުމުން އެކަނި ކަމުގައި އެވެ.
އޭނާ އިތުރަށް ފާހަގަ ކުރި ގޮތުގައި މިހާރުވެސް ރަށުން ބޭރުގައި އުޅޭ މީހުންނާއި ރަށުގައި އުޅޭ އެހެން ރަށްރަށުގެ މީހުންގެ ދަފްތަރެއް އެކުލަވާލުމަށް ކުރާ މަސައްކަތް ކުރިޔަށް ދާ ކަމަށާއި މިކަމަކީ އެކަމުގެ ތެރެއިން ކުރިޔަށް ގެންދާ ކަމެއް ކަމުގައި އެވެ.
މި ދަފްތަރުގައި ރަޖިސްޓްރީވުމަށް އެދޭ ފަރާތްތަކުން ކައުންސިލުން ދީފައިވާ ލިންކް މެދުވެރިކޮށް މައުލޫމާތު ފުރިހަމަކުރުމަށް ކައުންސިލުން ވަނީ އެދިފަ އެވެ.
