ޓްރާންސްޕޯޓް މިނިސްޓްރީން ބުނީ ޓެކްސީ ގަވައިދަށް ބަދަލު ގެނައީ އެއްގަމު ދަތުރުފަތުރުގެ ނިޒާމު ހަރުދަނާކޮށް، ހިދުމަތް ދޭ ފަރާތްތަކަށާއި ޑްރައިވަރުންނަށް ލުއިފަސޭހަ ގޮތްތަކެއް ހޯދައިދިނުމަށް ކަމަށެވެ. އަދި މި ބަދަލުތަކުގެ ސަބަބުން އާ ސެންޓަރުތައް އުފެދުމަށް ހުރި ހުރަސްތައް ކުޑަކުރެވި މާކެޓުގައި ވާދަވެރިކަން އުފެދ،ި އާންމުންނަށް ލިބޭ ހިދުމަތުގެ ފެންވަރު ރަނގަޅުވާނެ ކަމަށެވެ.
ގަވައިދަށް ގެނައި އެންމެ ބޮޑު ބަދަލަކީ ޓެކްސީ ސެންޓަރެއް ރަޖިސްޓްރީ ކުރުމަށްޓަކާ ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް މަދުކުރުމެވެ. މީގެއިތުރުން ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓަރީވެގެން މަސައްކަތް ކުރުމުގެ ފުރުސަތު ވެސް ލިބޭގޮތަށް ގަވައިދަށް ވަނީ ބަދަލު ގެނެސްފައެވެ.
މިނިސްޓްރީން ބުނީ ކުންފުންޏަކުން ދަތުރުފަތުރުގެ ހިދުމަތް ދޭ ނަމަ، އެކަމަކީ އެ ކުންފުންޏެއްގެ މެންޑޭޓުގައި ހިމެނޭ ކަމެއްކަން ދެން ކަށަވަރު ކުރަން ޖެހޭނެ ކަމަށެވެ. އަދި ގަވާއިދާ އެއްގޮތަށް ރަޖިސްޓަރީކޮށް ހުއްދަ ހޯދުން، ޓެކްސީގެ ހިދުމަތް ދޭ ކުންފުނިތަކަށް ދެން ލާޒިމްވާނެ ކަމަށް މިނިސްޓްރީން ބުނެއެވެ.
އޭގެ ބޭނުމަކީ ފަސިންޖަރުންނާއި ހިދުމަތް ދޭ ފަރާތްތަކަށްވެސް މަންފާ ކުރާނެ، އިތުބާރު ހުރި އަދި ޒަމާނީ ޓެކްސީގެ ނިޒާމެއް ރާއްޖޭގައި ގާއިމުކުރުންކަމަށްވެސް މިނިސްޓްރީން ބުނެއެވެ.
ޓެކްސީ ގަވައިދަށް ބަދަލުތަކެއް ގެނެސްފައި މިވަނީ ސަރުކާރުން ޓެކްސި ހިދުމަތް ދިނުމަށް ތައްޔާރުވަމުން އަންނަ ދަނޑިވަޅާ ދިމާކޮށެވެ.
ސަރުކާރަށް ދެ އަހަރު ފުރުން ފާހަގަކުރަން ބޭއްވި ރަސްމިއްޔާތުގައި ރައީސް ޑރ މުހައްމަދު މުއިއްޒު އެންމެ ފަހުން ވިދާޅުވީ އަންނަ ފެބްރުއަރީ މަހު ޓެކްސީ ލައިންގެ ހިދުމަތް ފެށޭނެކަމަށެވެ.
