ނަމަވެސް، ދުވާލަކު 3 ލީޓަރު ފެން ބުއި ނަމަވެސް، ހަންގަނޑު ކުރަކިވެ، ހިކިފައި ހުންނާތީ ގިނަ ބަޔަކު ޝަކުވާ ކުރެއެވެ. ހަމުގެ ޑޮކްޓަރުންނާއި ސައިންސްވެރިން ބުނާ ގޮތުގައި، ހަމައެކަނި ފެން ބުއިމަކުން ހަންގަނޑުގެ ތެތްކަން ނުހިފެެއްޓޭނެއެވެ.
މިކަމާ ގުޅޭގޮތުން ނިއުޔޯކުގެ މައުންޓް ސައިނައި ހޮސްޕިޓަލްގެ ކޮސްމެޓިކް އެންޑް ކްލިނިކަލް ރިސާޗްގެ ޑިރެކްޓަރު، ޑރ. ޖޯޝުއާ ޒައިކްނާ ވިދާޅުވެފައިވަނީ، ފެން ބުއިމުން ހަންގަނޑު ވަގުތުން ތެތްކޮށްލަދޭ ކަމަށް ހީކުރުމަކީ ކުށް ހީއެއް ކަމަށެވެ.
އޭނާ އިތުރަށް ތަފްސީލުކޮށްދެއްވި ގޮތުގައި، ހަންގަނޑު ހިކެން މެދުވެރިވާ މައިގަނޑު ސަބަބަކީ ހަށިގަނޑުގައި ފެން ނެތުމެއް ނޫނެވެ. އެއީ ހަންގަނޑުގެ ބޭރު ފަށަލަ ނުވަތަ "ސްކިން ބެރިއާ" ބަލިކަށިވުމުން، ހަންގަނޑުގައި ހުންނަ ފެން އާތްވެގެން ދިއުމެވެ. ސައިންސްވެރިން މިކަމަށް ކިޔަނީ "ޓްރާންސްއެޕިޑާރމަލް ވޯޓާ ލޮސް" އެވެ. ރާއްޖެ ފަދަ ހޫނު ގައުމެއްގައި، އަދި ގިނަ ވަގުތު އޭސީ ކޮޓަރީގައި އުޅޭނަމަ މިކަން ދިމާވާ މިންވަރު އަވަސްވެއެވެ.
"އެމެރިކަން އެކަޑަމީ އޮފް ޑާމަޓޮލޮޖީ" އިން ހާމަކޮށްފައިވާ ދިރާސާއެއްގައި ބުނެފައިވަނީ، ހަންގަނޑުގެ ތެތްކަން ހިފެހެއްޓުމަށް އެންމެ މުހިންމީ ބޯ ފެނަށްވުރެ ބޮޑަށް، ބޭރުން ހަންގަނޑުގައި އުނގުޅާ މޮއިސްޗަރައިޒާއެވެ. އެ އިދާރާގެ ލަފަޔަކީ ފެންވަރާ ނިމިގެން 3 މިނެޓު ތެރޭގައި ހަންގަނޑުގައި ކްރީމް އުނގުޅުމެވެ. މިހެން ހެދުމުން ހަންގަނޑުގެ މަތީގައި ތެތްކަން ބަންދުކޮށްދޭ ފަށަލައެއް އުފެދި، ފެން އާތްވަށްވެގެން ދިއުން ހުއްޓުވައެވެ.
މާޔޯ ކްލިނިކްގެ ހަމުގެ މާހިރުން ވެސް ބުނަނީ ހަންގަނޑު ރީތިކޮށް ބެހެއްޓުމަށް ފެން ބުއިން މުހިންމު ނަމަވެސް، ހަންގަނޑު ހިކުމުގެ މައްސަލަ ހައްލުކުރެވޭނީ ބޭރުފުށުން ފަރުވާކޮށްގެން ކަމަށެވެ. އެގޮތުން، "ސެރަމައިޑްސް" ނުވަތަ "ހަޔަލުރޮނިކް އެސިޑް" އެކުލެވޭ ކްރީމް ބޭނުންކުރުމަށް މާހިރުން އިރުޝާދު ދެއެވެ. ވީމާ، ހަމައެކަނި ފެންފުޅިއަށް ބަރޯސާވުމުގެ ބަދަލުގައި، ރަނގަޅު މޮއިސްޗަރައިޒާއެއް ބޭނުންކުރުމަކީ "ގްލޯވިން" ހަންގަނޑެއް ހޯދުމަށް ކޮންމެހެން ކުރަންޖެހޭ ކަމެކެވެ.
