މިއީ މައިންބަފައިންނަށް އެވަގުތަށް ލިބޭ ފަސޭހައެއް ކަމުގައި ވިޔަސް، ސައިންސްވެރިން އިންޒާރު ދެނީ މިއީ ކުއްޖާގެ ނަފްސާނީ ދުޅަހެޔޮކަމަށް ހުރި ބޮޑު ނުރައްކަލެއް ކަމަށެވެ.
މިކަމާ ގުޅޭގޮތުން އެމެރިކާގެ "މިޝިގަން މެޑިސިން" އިން ވަނީ ވަރަށް ފަހުން ފުޅާ ދިރާސާއެއް ކޮށް، މަޝްހޫރު މެޑިކަލް ޖާނަލް "ޖާމާ ޕީޑިއެޓްރިކްސް" ގައި ޝާއިއުކޮށްފައެވެ.
އުމުރުން 3 އަހަރާއި 5 އަހަރާ ދެމެދުގެ ކުދިން ބައިވެރިކޮށްގެން ހެދި މި ދިރާސާއިން ދެއްކި ގޮތުގައި، ރޯ ކޮންމެ ފަހަރަކު ފޯނު ދީގެން މައިތިރިކުރާ ކުދިންގެ ކިބައިގައި، "އިމޯޝަނަލް ރެގިއުލޭޝަން" ނުވަތަ އަމިއްލަ ޖަޒުބާތުތައް ކޮންޓްރޯލް ކުރުމުގެ ހުނަރު ވަރަށް ދެރައެވެ. އަދި މުސްތަގުބަލުގައި އެކުދިންގެ ފަރާތުން ރުޅިގަދަވުމާއި މޫޑު ބަދަލުވުމުގެ މައްސަލަތައް ފެނުން ގާތްކަމަށް ދިރާސާއިން ދައްކައެވެ.
މި ދިރާސާގައި އިސްކޮށް އުޅުއްވި، ޔުނިވާސިޓީ އޮފް މިޝިގަން ހެލްތު ސީއެސް މޮޓް ޗިލްޑްރަންސް ހޮސްޕިޓަލްގެ ޑރ. ޖެނީ ރަޑެސްކީ ވިދާޅުވީ، ޑިޖިޓަލް ވަސީލަތްތަކަކީ ކުދިން މަސަލަސްކުރާ އެއްޗެއްގެ ގޮތުގައި ބޭނުންކުރުމަކީ ކުއްޖާއަށް ދަސްވާންޖެހޭ މުހިންމު ފިލާވަޅަކަށް އެޅޭ ހުރަހެއް ކަމަށެވެ.
މާހިރުން ފާހަގަކުރާ ގޮތުގައި ކުޑަކުދިންނަށް ރުޅި ކޮންޓްރޯލް ކުރަން ދަސްވަނީ، އެ އިހުސާސްތައް ތަޖުރިބާކޮށް، މައިންބަފައިންގެ އެހީތެރިކަމާއެކު އެކަމުން އަރައިގަނެގެންނެވެ. ފޯނު ދިނުމުން ވަގުތީ ހައްލެއް ލިބުނަސް، ކުއްޖާ ބޮޑުވަމުން އަންނައިރު އަމިއްލަ ނަފްސު މައިތިރިކުރަން ނޭނގި، ކުޑަ ކަމަކާވެސް އިންތިހާއަށް ރުޅިގަދަވާ މީހަކަށް ބަދަލުވެއެވެ.
މައިންބަފައިން ހަދަންވީ ކިހިނެއް؟
ޑރ. ރަޑެސްކީ އަދި ކުޑަކުދިންގެ ނަފްސާނީ މާހިރުން ލަފާދެއްވަނީ ކުއްޖާ ރޯ ވަގުތު ފޯނު ދިނުމުގެ ބަދަލުގައި ތިރީގައިވާ ކަންކަން ކުރުމަށެވެ:
ސެންސަރީ ޓެކްނިކްސް ބޭނުންކުރުން: ކުއްޖާ ގައިގައި ބައްދާލުން، ނުވަތަ މަޑުމަޑުން ވާހަކަ ދެއްކުން.
އިހުސާސްތަކަށް ނަން ދިނުން: "ދަރިފުޅު ތިހުރީ ވަރަށް ދެރަވެފައި/ރުޅިއައިސްފައި ދޯ؟" މިހެން ބުނެ ކުއްޖާގެ އިހުސާސްތައް ބަލައިގަތުން.
ވަގުތު ދިނުން: ކުއްޖާ ރޯން ފެށުމުން އެކަން ހުއްޓުވަން އަވަސްވެގަތުމުގެ ބަދަލުގައި، އެ ޖަޒުބާތުތައް ބޭރުކޮށްލަން ކުއްޖާއަށް ފުރުސަތު ދިނުން.
މިއީ ވަގުތުން ނަތީޖާ ފެންނަ ކަމަކަށް ނުވެދާނެއެވެ. އެހެންނަމަވެސް، މިއީ ދަރިފުޅުގެ ދުޅަހެޔޮ މުސްތަގުބަލަށްޓަކައި ކޮންމެހެން ވެސް ކުރަންޖެހޭ މުހިންމު އިންވެސްޓްމަންޓެކެވެ.
