ދިރާސާތަކުން ދައްކާ ގޮތުގައި ޅަފަތުގައި ބައްޕައާއެކު ގިނަ ވަގުތު ހޭދަކުރާ ކުދިންގެ އައިކިއު ރަނގަޅެވެ.
އިނގިރޭސިވިލާތުގެ "އިމްޕީރިއަލް ކޮލެޖް ލަންޑަން" އާއި "އޮކްސްފޯޑް ޔުނިވާސިޓީ" އަދި "ކިންގްސް ކޮލެޖް ލަންޑަން" ގުޅިގެން ކުރިއަށް ގެންދިޔަ ދިރާސާއެއްގައި ވަނީ 128 ނުވަތަ އެއަށްވުރެ ގިނަ އާއިލާގެ ކުދިންގެ ހެދިބޮޑުވުން ބަލާފައެވެ. މި ދިރާސާއިން ދެއްކި ގޮތުގައި، ކުއްޖާ އުފަންވީއްސުރެ ފެށިގެން ބައްޕައާއެކު ފޮތްކިޔުމާއި ކުޅިވަރު ކުޅުމުގައި ވަގުތު ހޭދަކުރާ ކުދިން، އުމުރުން 2 އަހަރު ވާއިރު އެހެން ކުދިންނަށްވުރެ ވިސްނުން ތޫނުވެފައި ދަސްކުރުމުގެ ހުނަރު މޮޅެވެ.
ބައްޕަގެ ދައުރު ތަފާތުވަނީ ކީއްވެ؟
މާހިރުން ފާހަގަކުރާ ގޮތުގައި ބައްޕައިން ކުދިންނާއެކު ކުޅޭ ކުޅިވަރުތައް މައިންނާ ތަފާތެވެ. ގިނަ ފަހަރަށް ބައްޕައިން އިސްކަންދެނީ ހަރަކާތްތެރިވެ އުޅޭ، އަދި "ރަފް އެންޑް ޓަމްބްލް" ނުވަތަ ތަންކޮޅެއް ހަލަނި ކުޅިވަރުތަކަށެވެ. މިކަމުގެ ސަބަބުން ކުދިންނަށް މައްސަލަ ހައްލުކުރާނެ ގޮތާއި، ރިސްކު ނަގާނެ ގޮތް އަދި ކަންކަމާ ކުރިމަތިލާން ދަސްވެއެވެ.
އެމެރިކާގެ "އެމެރިކަން ސައިކޮލޮޖިކަލް އެސޯސިއޭޝަން" އިން ޝާއިއުކޮށްފައިވާ ދިރާސާއެއްގައި ބުނާ ގޮތުން، ބައްޕައިން ކުދިންނާ ވާހަކަދައްކާއިރު ބޭނުންކުރާ ބަސްތައް ވެސް މައިންނާ ތަފާތެވެ. މައިން އާންމުކޮށް ކުއްޖާއަށް އެނގޭ ބަސްތައް ބޭނުންކުރާއިރު، ބައްޕައިން ގިނަ ފަހަރަށް ކުއްޖާއަށް އާ ބަސްތައް ބޭނުންކޮށް، "ކީއްވެ؟"، "ކިހިނެއް؟" ފަދަ ސުވާލުތައް ކުރުން ގިނައެވެ. މިއީ "ބްރިޖް ހައިޕޮތެސިސް" ގެ ގޮތުގައި ސައިންސްވެރިން ސިފަކުރާ ކަމެކެވެ. މީގެ ސަބަބުން ކުއްޖާގެ ސިކުނޑި އިތުރަށް މަސައްކަތްކޮށް، ބަސްކޮށާރު މުއްސަނދިވެ، ވިސްނުން ފުޅާވެގެން ދެއެވެ.
ޔުނިވާސިޓީ އޮފް ލީޑްސްގެ ރިސާޗަރުން ވެސް ވަނީ މިކަން ކަށަވަރުކޮށްދީފައެވެ. އެފަރާތުން ބުނާ ގޮތުގައި ޕްރައިމަރީ ސްކޫލުގައި ކުދިން ހޯދާ ނަތީޖާއަށް ބަލާއިރު، ބައްޕައާއެކު ގިނަ ވަގުތު ހޭދަކުރާ ކުދިންގެ ނަތީޖާ މާ ރަނގަޅެވެ.
ދަރިފުޅު މޮޅު ކުއްޖަކަށް ހެދުމަށްޓަކައި ބައްޕައިން ހަމައެކަނި ފައިސާ ހަރަދުކުރުމުން ނުފުދެއެވެ. ކުއްޖާގެ ވިސްނުން ތޫނު ކުރުމަށްޓަކައި، ކޮންމެ ދުވަހަކުވެސް ކުޑަ ވަގުތުކޮޅަކަށް ނަމަވެސް ކުއްޖާއާއެކު ކުޅެ، ފޮތް ކިޔައިދީ، ވާހަކަ ދެއްކުމަކީ ކޮންމެހެން ކުރަންޖެހޭ ކަމެކެވެ.
