ބްލަޑް ބޭންކުގައި ހުރި ލޭ އިންތިހާއަށް މަދުވެ، ލޭ ލިބުން ދަތިވެފައިވެ މޯލްޑިވްސް ބްލަޑް ސާވިސަސް (އެމްބީއެސް)އިން އާންމުންގެ އެހީތެރިކަމަށް އެދިފައިވަނިކޮށް މިއަދުގެ ހުކުރު ހުތުބާ ހާއްސަކޮށްފައިވަނީ ލޭ ހަދިޔާކުރުމުންގެ މާތްކަމުގެ މައްޗަށެވެ.
ހުތުބުގައި ބުނީ މީހެއްގެ ފުރާނަ ސަލާމަތްކުރުމަށް ޓަކައި އަމިއްލަ ހަށިގަނޑުގައި ހުރި ލޭ ހަދިޔާކުރުމަކީ ސަދަގާތެއްކަމަށާއި ތިމާއަށް ކޮށްލެވޭ މި ފަދަ ހޭދައެއްގެ ސަބަބުން ނިޢުމަތްތަކުން ފުރިގެންވާ ސުވަރުގެ ވަނުމުގެ ނަސީބު ލިބެގެންދާކަމަށެވެ.
މާތް اللهގެ އަޅުތަކުންނަށް ޖެހޭ ބޭނުންތައް ފުއްދައިދީ، އެއުރެންނަށް ޖެހޭ ބޮޑެތި ކަންކަމުގައި މިއަދު އެހީތެރިވުމަކީ، މާދަމާ (އާހިރަތްދުވަހުން) ތިޔަބައިމީހުން އުފުލާންޖެހޭ ބޮޑެތި މުސީބާތްތަކުން ދިންނަވާނޭކަމެއްކަމަށް ހުތުބާގައިވެެއެވެ. އަދި ކޮންމެ މުސްލިމަކު ވެސް މިއަދު އަވަސްވެގަންނާންވީ އެ ދުވަހުގެ ބިރުވެރިކަމާއި، އަޒާބުން މިންޖުވާނޭ ޢަމަލެއް ކުރެވޭތޯކަމަ\ށާއި އެ ކަން ކުރެވޭން އޮތީ މިއަދުކަމަށްވެސް ހުތުބާގައިވެއެވެ.
ލޭ އަޅާން ބޭނުންވާ ހާލަތްތަކުގައި، ބަލި މީހަކަށް އަޅާން ބޭނުންވާ ލޭ ހަދިޔާކޮށްދިނުމަކީ، އޭނާގެ ފުރާނަ ސަލާމަތްކޮށްދިނުން ފަދަ ކަމެއްކަން ބަޔާންކޮށް އެކަމުގައި ހުރި ދަރުމަޢާއި ސަވާބުގެ ވާހަކަތައް ހުތުބާގައި ވަނީ ހިމަނާފައެވެ.
ލޭހަދިޔާކުރުމަކީ ދެމިގެންވާ ސަދަގާތެއްކަމުގައި އިލްމުވެރީން ދެކެވަޑައިގަންނަވާކަމަށް ހުތުބުގައިވެއެވެ. އަދި އެއީ އިންސާނާ މަރުވުމަށް ފަހުގައި ވެސް، އެ ސަދަގާތެއްގެ ހެޔޮ އަސަރު ދެމިހުރިހައި ހިނދަކު، ސަދަގާތްކުރި މީހާއަށް ސަވާބު ލިބިލިބި ހުންނާނޭ ކަމެއްކަމަށްވެސް ހުކުރު ހުތުބުގައިވެއެވެ.
އެހެންކަމުން ލޭ ހަދިޔާކުރުމަށް އަވަސްވެ ގަތުމަށް މިއަދުގެ ހުތުބާގައިވަނީ ގޮވާލާފައެވެ.
ލޭ ހަދިޔާކުރުމުގެ އިތުރަށް ވެސް މީހުންގެ ފުރާނަ ސަލާމަތްކުރުމަށް ކުރެވިދާނޭ ކިތަންމެ ކަމެއް ހުންނަން ހުތުބާގައި ވަނީ ބުނެދީފައެވެ. އެގޮތުން ކާންބޯން ނުލިބޭ މީހުންނަށް ކާނޭ އެތިކޮޅެއްދިނުން، ތަނަވަސްކަން ނެތުމުގެ ސަބަބުން ބޭސްފަރުވާ ނުކުރެވިގެން އުޅޭ މީހުންނަށް އެހީވެދިނުން، އެއްގަމާއި، ކަނޑާއި، ވައިގެ ދަތުރުތަކުގައި ކުރިމަތިވާ ހާދިސާތަކުގައި އަނިޔާވާ މީހުން ސަލާމަތްކުރުމަށް މަސައްކަތްކުރުމާއި އެ މީހުންނަށް އަވަސްފަރުވާ ދިނުމާއި، ހޮސްޕިޓަލާހަމައަށް އެ މީހުން ގެންގޮސްދިނުމަކީ، އޭގެތެރޭގައި ހިމެނޭ ކަންކަންކަމަށް ހުތުބާގައި ވެއެވެ.
