މިއީ އަޑު އިވޭއިރު ބިރުވެރި ކަމެއްހެން ހީވިޔަސް، ސައިންސްވެރިން ބުނަނީ މިއީ ކައިވެނީގެ ގުޅުން ވަރުގަދަކޮށްދޭ، އަދި ލޯބި އިތުރުކޮށްދޭ ކަމެއް ކަމަށެވެ.
އެމެރިކަން އެކަޑަމީ އޮފް ސްލީޕް މެޑިސިން އިން ދާދި ފަހުން ހެދި ދިރާސާއަކުން ދައްކާ ގޮތުގައި، އެމެރިކާގެ ދެމަފިރިންގެ ތެރެއިން ތިންބައިކުޅަ އެއްބައި މީހުން މިހާރު ނިދަނީ ވަކި ކޮޓަރީގައި ނުވަތަ ވަކި އެނދުގައެވެ. މައިގަނޑު ސަބަބަކީ ބައިވެރިޔާ ގަދަޔަށް ގުުރައި ދަމާތީ، ރަޖާ ދަމާތީ ނުވަތަ ނިދާފައި އޮވެ ތަޅޭތީ، ރަނގަޅަށް ނުނިދުމުގެ މައްސަލައެވެ.
މިކަމާ ގުޅޭގޮތުން ވާހަކަދައްކަވަމުން ނިދުމާ ބެހޭ މަޝްހޫރު ޑޮކްޓަރެއް ކަމަށްވާ ޑރ. ވެންޑީ ޓްރޮކްސެލް ވިދާޅުވީ، ރަނގަޅަށް ނުނިދުމަކީ ކައިވެނި ރޫޅުމަށް މެދުވެރިވާ ސަބަބެއް ކަމަށެވެ.
ގިނަ ބަޔަކު ހީކުރަނީ ވަކިން ނިދުމުން ދެމަފިރިންގެ ދެމެދުގައި އޮންނަ ލޯބި ފަނޑުވެދާނެ ކަމަށެވެ. ނަމަވެސް ދިރާސާތަކުން ދައްކަނީ އޭގެ އިދިކޮޅެވެ. ވަކިން ނިދާނަމަ، އެކުގައި ވަގުތު ހޭދަކުރަން ދެ މީހުން ވެސް ހާއްސަ ސަމާލުކަމެއް ދެއެވެ. އަދި ނިދި ހަމަވުމުން ލިބޭ ތާޒާކަމާއެކު، އެކަކު އަނެކަކަށް އަޅާލާ މިންވަރު އިތުރުވެގެންދެއެވެ. އެހެންކަމުން، ރޭގަނޑު ނުނިދިގެން ޒުވާބުކުރުމުގެ ބަދަލުގައި، ވަކިން ނިދުމަކީ ކައިވެނި ސަލާމަތްކުރުމަށް އޮތް ރަނގަޅު ހައްލެއް ކަމަށް މާހިރުން ލަފާދެއެވެ.
