ބޭންކަށް މި އެވޯޑު ދީފައި ވަނީ މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަން އިން އިންތިޒާމުކޮށްގެން އާދިއްތަ ދުވަހުގެ ރޭ ބޭއްވި މޯލްޑިވްސް ސްޕޯޓްސް އެވޯޑްސްގަ އެވެ.
ބީއެމްއެލުން ބުނީ، ރާއްޖޭގައި ކުޅިވަރުތައް ކުރިއަރުވަން އެ ބޭންކުން ކޮންމެ އަހަރަކު ވެސް ގައުމީ ކުޅިވަރު ޖަމިއްޔާތަކާ ގުޅިގެން، ގައުމީ ފެންވަރުގެ މުބާރާތްތައް ބާއްވަން އެހީތެރިވެ، ކުޅުންތެރިންގެ ހުނަރު ތަރައްގީ ކޮށްދޭން މަސައްކަތްކުރާ ކަމަށެވެ.
ކުޅިވަރުގެ ދާއިރާއިން ކުރިއަށްދާން ބޭނުންވާ ޒުވާނުންނަށް ފުރުސަތު ހޯދައިދިނުމުގެ ގޮތުން 2023 ވަނަ އަހަރުން ފެށިގެން ބީއެމްއެލް ސްޕޯޓްސް ސްކޮލާޝިޕް އަންނަނީ ދެމުންނެވެ. މި ސްކޮލާޝިޕްގެ ދަށުން މިހާތަނަށް 8 އެތުލީޓުންނަށް ރާއްޖެއިން ބޭރުން ތަމްރީނު ހޯދުމުގެ ފުރުސަތު ވަނީ ފަހިކޮށްދީފަ އެވެ.
މީގެ އިތުރުން ބޭންކުން ވަނީ ބާސްކެޓް ބޯޅަ އެރީނާއެއް ގާއިމްކުރުމަށް އެމްބީއޭ އާއެކު އެއްބަސްވެފައެވެ. އަދި ގައުމީ ފުޓްބޯޅަ ޓީމުގެ ރަސްމީ ސްޕޮންސަރގެ ގޮތުގައި 2017 އިން ފެށިގެން ބީއެމްއެލްއިން އަންނަނީ ފުުޓްބޯޅަ އެސޯސިއޭޝަނަށް އެހީތެރިވަމުންނެވެ. ދާދި ފަހުން ބޭންކުން ވަނީ އަނެއްކާ ވެސް ރާއްޖޭގެ ގައުމީ ފުޓްބޯޅަ ޓީމުތައް ސްޕޮންސާކޮށްފަ އެވެ.
