އާޓިފިޝަލް ބީޗުގައި ޕީއެންސީން ބޭއްވި ތަރާވީހުގައި ވާހަކަފުޅު ދައްކަވަމުން ރައީސް މުއިއްޒު ވަނީ އެމަނިކުފާނު މޭޔަރުގައި ކުރެއްވި ކަންކަމުގެ ވާހަކަތައް ވިދާޅުވެފައެވެ. އެގޮތުން އެމަނިކުފާނު މޭޔަރަކަށް ހުންނަވައިގެން މާލޭގެ ރައްޔިތުންނަށް ކޮށްދޭން ރޭވި އެކިކަން އެކުލަވާލާ ސްޓްރެޓީޖިކް ޕްލޭން ފޮތެއް އޮންނާނެކަމަށެވެ. އެހެންނަމަވެސް އިދިކޮޅު އެމްޑީޕީއަށް މޭޔަރުކަން ލިބުމުން އެކަންކަން ހުއްޓިފައިވާކަމަށް ރައީސް މުއިއްޒު ވިދާޅުވިއެވެ.
މިހާރު އޮތް ކައުންސިލްގައި އޮތީ ޕީއެންސީގެ މެޖޯރިޓީ އޮވެ ކަމެއް ނުވާކަމަށޤ މީހުން ބުނެފާނެކަމަށް ވިދާޅުވެ ކައުންސިލުގައި ހިމެނޭ ސަރުކާރު މެމްބަރުންގެ ދިފާއުގައި ރައީސް ރޭ ވަނީ ވާހަކަ ދައްކަވާފައެވެ. އެގޮތުން މެޖޯރިޓީ އޮތަސް ކައުންސިލްގެ އުސޫލު އޮންނަ ގޮތުން މެޖޯރިޓީއަށް ކަމެއް ނުކުރެވޭނެކަމަށް ރައީސް މުއިއްޒު ރޭ ވީދާޅުވިއެވެ.
ކައުންސިލްތަކަށް ޕީއެންސީގެ މެޖޯރިޓީ ދިނަސް ކަންކަން އެޖެންޑާކުރުމާއި ތަންފީޒު ކުރުމުގައި އެންމެ އިސް ދައުރެއް އަދާކުރަނީ ކައުންސިލްގެ އެންމެ އިސްމަގާމުގައި ހުންނެވި ބޭފުޅަކު ކަމަށް ވާތީ، ސިޓީތަކުގެ މޭޔަރުންނާއި ކައުންސިލްގެ ރައީސުންނަށް ޕީއެންސީގެ ކެންޑިޑޭޓުން އިހުތިޔާރުކުރުމަށް ވެސް ރައީސް މުއިއްޒު ރޭ ވަނީ އެދިވަޑައިގެންފައެވެ.
