މިއަދު ކުރިއަށްދިޔަ ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ރައީސް މުއިއްޒު ވިދާޅުވީ، ރައީސް ޑރ. މުއިއްޒު ވިދާޅުވީ، ސިނަމާލެ ފްލެޓް 1،2،3،4 އަދި މާލެ ހިޔާ 1،2 ގެ ފްލެޓްތައް މަރާމާތުކުރުމަށް އެތަނުގެ ވެރިންނަށް ޖުމްލަ 100،000ރ. ދިނުމަށް ސަރުކާރުން ނިންމުމަކީ އެއްވެސް ވަރަކަށް ރިޝްވަތެއް ނޫން ކަމަށެވެ. އެ ފައިސާ ދިނުމަކީ އެމަނިކުފާނުގެ ރިޔާސީ މެނިފެސްޓޯގައި ހިމެނިފައިވާ ކަމެއް ކަމަށް ވިދާޅުވި އެވެ. އަދި ރިޔާސީ އިންތިހާބުގެ އެކިއެކި ކެމްޕޭނުގައި ވެސް ވާނީ އެ ވާހަކަފުޅު ދައްކަވާފައި ކަމަށް ވިދާޅުވިއެވެ.
ސިނަމާލެ އާއި މާލެހިޔާ ފްލެޓްތަކުގައި ދިރިއުޅޭ މީހުންނާއެކު މިދިޔަ މަހުގެ 17 ގައި ރައީސް މުއިއްޒު ބޭއްވި ބައްދަލުވުމުގައި އެ ރައްޔިތުންވަނީ އެ ފްލެޓްތަކުގެ ހާލަތާއި ދައްކަން ޖެހޭ ކުއްޔާއި ޖޫރިމަނާގެ ކަންކަމުގައި ހުރި ކަންބޮޑުވުންތައް ހިއްސާކޮށްފައިވެ އެވެ. އެގޮތުން އެ ކަންބޮޑުވުންތަކަށް ހައްލެއް ހޯއްދެވުމުގެ ގޮތުން ރައީސް ވަނީ، ރައީސް އޮފީހުން ބުނި ގޮތުގައި، ސިނަމާލެ 1، 2، 3 އަދި 4 އާއި މާލެހިޔާ 1 އަދި 2ގެ ވެރިފަރާތްތަކަށް އިނާޔަތެއް ދޭން އޮތީ ނިންމައިފަ އެވެ.
ފްލެޓްތައް ބާވެ، ސްޓްރަކްޗާ ހަލާކުވެފައިވާތީ އާއި އެ ކަމަށް ހައްލެއް ހޯއްދައި ނުދެވި ގިނަ ދުވަސްވެފައި ވާތީ، މި ފްލެޓްތަކުގެ މީހުންނަށް އިނާޔަތެއްގެ ގޮތުގައި ދޭން ނިންމާފައި ވަނީ 100،000ރ. އެވެ. ފްލެޓުގެ ވެރިފަރާތުން ފްލެޓަށް ދައްކަން ޖެހޭ ޖުމުލަ އަދަދު 100،000ރ. އަށް ވުރެ ބޮޑުވާ ނަމަ، 100،000ރ އާ ހަމައަށް އުނިކުރަން ވަނީ ނިންމައިފަ އެވެ. އަދި ފްލެޓަށް ދައްކަން ޖެހޭ ޖުމްލަ އަދަދު 100،000ރ. އަށް ވުރެ ކުޑަ ނަމަ، އެ މިންވަރެއް މާފުކޮށް ދިނުމަށް ފަހު، އެ އަދަދުން ބާކީވާ މިންވަރެއް ފްލެޓްގެ ވެރިފަރާތުގެ އެކައުންޓަށް ޖަމާކުރާނެ ކަމަށް ރައީސް ވިދާޅުވި އެވެ.
ކައުންސިލް އިންތިހާބާ ދިމާކޮށް ސިނަމާލޭގެ ހަތަރު ފްލެޓާއި މާލޭ ހިޔާގެ ދެ ފްލެޓުގައި ހުންނަ ޖުމްލަ 161 އެޕާޓްމަންޓްގެ ކޮންމެ ވެރިޔަކަށް އެއް ލައްކަ ރުފިޔާ ދޭން ރައީސް މުއިއްޒު ނިންމެވި މައްސަލަ ސަރުކާރާއި އިދިކޮޅު ވިސްނުމުގެ މީހުން ވަނީ އެންޓި ކޮރަޕްޝަން ކޮމިޝަން (އޭސީސީ) އަށް ހުށައަޅާފަ އެވެ.
