ޕީޖީ އޮފީހުން ބުނީ، އައްޑޫ ސިޓީގައި މަސްތުވާތަކެތި ވިޔަފާރި ކުރުމުގައި އިސްކޮށް ހަރަކާތްތެރިވާ ކަމަށް ތުހުމަތު ކުރެވޭ ބަޔެއްގެ މައްޗަށް ހިންގި ތުހުމަތުގެ މުއްދަތު ހަމަވިއިރު އެ މީހުންނަށް ދައުވާ ކުރެވޭ ވަރަށް ހެކި ހޯދިފައި ނުވާތީ، ބަންދުގައި ތިބި މީހުން ދޫކޮށްލަން ލަފާދީފައިވާ ކަމަށެވެ.
އައްޑޫގައި މަސްތުވާތަކެތީގެ ވިޔަފާރީ ހިންގާ ބޮޑުންކަމަށް ތުހުމަތުކޮށް، މި ސަރުކާރުން އޮޕަރޭޝަން އަލިމަގުގެ ނަމުގައި ހިންގި ހަރަކާތެއްގައި މިދިޔަ ޑިސެންބަރު މަހުގެ ހަތަރުވަނަ ދުވަހު ވަނީ ފަސް މީހަކު ހައްޔަރުކޮށްފަ އެވެ.
އެ މައްސަލައިގައި ތުހުމަތު ކުރެވޭ މީހުންނަކީ:
ސ. ހިތަދޫ، ކޮންމުލި، ޢަލީ ނަދީމް (މައިލޯ ނަދަމާ)
ސ. ހިތަދޫ، ވެޔޮފެހެބުރުގެ، އިބްރާހީމް ސިރާޖް
ސ. ހިތަދޫ، ދޮރުފޮތިމާގެ، ހަސަން އަލްފާފު
ސ. ހިތަދޫ، ކެކުރިމާގެ، އަމީން މުހައްމަދު
ސ. ހިތަދޫ، ލޮބްސްޓަމް، ސަލާމް ސައީދު
ސ. ހިތަދޫ، ފަލާހް، ހާފިޘް ފައުޒީ
ދ. ހުޅުދެލި، އަންބަރީގެ، ޒަހްނާ އަހްމަދު
ޕީޖީ އޮފީހުން ބުނީ އެ މީހުންގެ މައްޗަށް ކުރެވެނީ މައިގަނޑު ދެ ތުހުމަތެއް ކަމަށެވެ. އެއީ ކުށް ކުރާ ޖަމާއަތެއްގައި ބައިވެރިވުމާއި މަނީ ލޯންޑްރިންގެ ތުހުމަތު ކަމަށެވެ.
އެ އޮފީހުން ބުނީ އެ މައްސަލައިގެ ތަހުގީގުކުރުމަށް ގާނޫނުގައި ކަނޑައެޅިފައިވާ މުއްދަތު ހަމަވެފައިވާ ކަމަށެވެ. އެ މުއްދަތުގައި ލިބިފައިވާ ހެކި ގަރީނާ ވަޒަންކޮށް ބެލިއިރު، އެ މައްސަލައިގައި ތުހުމަތުކުރެވޭ މީހުން، ކުށްކުރާ ޖަމާޢަތެއްގައި ބައިވެރިވިކަން ނުވަތަ މަނީ ލޯންޑާކުރިކަން ގާނޫނުގައި ކަނޑައެޅިފައިވާ މިންގަނޑަށް ސާބިތުކޮށްދެވޭ މިންވަރަށް ހެކި ގަރީނާ ލިބިފައި ނުވާ ކަމަށް ޕީޖީ އޮފީހުން ބުންޏެވެ.
