ހުކުރު ދުވަހު އަހަންނަށް ލިބޭ ހާއްސަ ސަމާލުކަން އަހަރެންގެ ދެ ދަރީންނަށް ދިނުން މަންމައަށް މަނާވި ދުވަހުން ފެށިގެން، މަންމަގެ ހާއްސަ އުފެއްދުންތަށް ހަމައެކަނި ލިބެނީ އަހަރެންނާއި ބައްޕަ އަށެވެ. އެއްތަށިމަތީގައި ކެޔަސް، އަހަރެންގެ މަންމަ ހަދާފައި ހުންނަ ފާޑުފާޑުގެ ބުއިންތަށް ނުބޮއުމަށް އަހަރެންގެ ދެ ދަރީންނަށް، އެކުދިންގެ މަންމަ ވަނީ އަންގާފަ އެވެ. އެކުދިންގެ މަންމަގެ ރުހުމާއި ދެކޮޅަށް އެފަދަ އެއްވެސް އެއްޗެއް ދެވޭތޯ މަންމަ އެއްވެސް މަސައްކަތެއް ނުކުރާކަން އަހަރެން ފާހަގަކުރަނީ އުފަލާއެކުގައި ކަމަށް ޒިމާލްއަށް ހީވަންޏާއި އެއީ ކުށެކެވެ. މަންމަ ހިތުގައި ޖެހޭފަދަ ކަމެއް އަހަރެން ދުވަހަކުވެސް ގަސްދުގައި ނުކުރަމެވެ. ޒިމާލްގެ ހިތުގައި ޖެހިދާނެ ކޮންމެ ކަމަކަށް އަހަރެން ފަރުވާތެރިވަމެވެ.
ކޮންމެއަކަސް އަހަރެންގެ މައިންބަފައިންނަކީ ތަންދޮރު ދަންނަ، އުޅުން ހުރި ހަރުދަނާ އަދި މުސްކުޅި އުމުރުގައިވެސް ރީތި އުޅުމެއް އުޅުނު ހެޔޮ އަހްލާގެއްގެ ދީންވެރި ބައެކެވެ.
އެއްޗެއްގެ އަގު އަދި އެއްޗެއްގެ މުހިއްމުކަން އެނގޭނީ ތިމާގެ އަތުން އެ އެއްޗެއް ބީވެ ދިއުމުންނެވެ.
މިއީ ވަރަށް އަނގަމަތީ ބަހެކެވެ. އެ ބުނާ އެއްޗަކާ މެދުގައި ފުންކޮށް ވިސްނާލެވުނީ އަހަރުމެންގެ ތެރެއިން ކިތަށް މީހުނަށްބާ އެވެ. ތިމާގެ އަމިއްލަ ނަޒަރުން އެ އިބާރާތާއި މެދު ދުވަހަކުވެސް ވިސްނާލެވުނު ކިތަށް މީހުން އުޅޭނެ ބާ އެވެ؟ އެވޯޑް ދޭ ރަސްމިއްޔާތު ތަކުގައި 'ލައިފް ޓައިމް އެޗީވްމެންޓް އެވޯޑް'ގެ ނަމުގައި ތައާރަފްކޮށްފައި އެވާ ޝަރަފުގެ މަގުސަދާއިމެދު ވިސްނާލީ ކިތަށް މީހުން ހެއްޔެވެ؟ ދުނިޔޭގައި ދިރިހުރި ދުވަހު ނުދިން ޝަރަފަކާއި ގަދަރެއް، ސްޓޭޖްމަތީން އާއިލާއާއި ހަވާލުކުރުމުން އެ ހާސިލްވަނީ ކޮން ކަމެއް ހެއްޔެވެ؟ އެ އެވޯޑް ލިބިގަތުމަށް ސްޓޭޖަށް އަރަން އެ އައީ، އެވޯޑް ހާސިލްކުރުމުގައި ކިހައި މިންވަރަކަށް ޝާމިލްވި ފަރާތެއް ހެއްޔެވެ؟ އެމީހެއްގެ އެ މަސައްކަތަށް ނުވަތަ އެ ހިދުމަތަށް ދިން އިއްޒަތެއް އެ ނޫނީ އޮތް ބާވަ އެވެ؟
މިރޭ ވާހަކަ މި ދައްކަނީ، މި ވާހަކަތަށް އަޑުއަހާނެ ކަންފަތެއް އަހަރެންނާއެކު އިނީތީއެއް ނޫނެވެ. އަމިއްލަ ހިތާއި އެތަށް ސުވާލެއް ކޮއްފީމެވެ. އަހަރެންގެ އަމިއްލަ ނަފުސަށް މައާފުކުރެވޭނެ އެއްގޮތެއްވެސް ނެތެވެ. ދުނިޔޭގެ ނާއިންސާފާއިމެދު ވިސްނާން އަހަންނަށް މަޖުބޫރުކުރީ އަމިއްލަ ދިރިއުޅުމުގެ ތަޖުރިބާ އެވެ.
އަހަރެންގެ މަންމަ ނިޔާވުމުގެ ވޭނީ ކަރުނަ މި ދެ ލޮލުން އަދި ނުހިކެ އެވެ. ހިތާމައިގައި ބައިވެރިކުރާންވީ އަހަރެންގެ ދެ ދަރީންކަމެއް ނުވަތަ އަންހެނުން ކަމެއް ނޭގުނެވެ. ސިކުނޑި ބުނީ ބައްޕައާއެކު ވަގުތު ހޭދަކުރުމަށެވެ. ހިތް ބުނީ އަމިއްލަ ކުށް އިހްސާސްކުރެވެންދެން އެކަނިވެރި ވަގުތުތަށް ގުނުމަށެވެ. ހިތާއި ސިކުނޑީގެ އަރާރުމުގައި މިފަހަރު އަހަރެން ކުރި ހޯދައިދިނީ ހިތަށެވެ. އެއީ އަހަރެންގެ މަންމަ އެކަން ކުރާގޮތެވެ. ހިތާއި ސިކުނޑި މުޑިއަރާ ކޮންމެ ފަހަރަކު އިސްކުރަނީ ހިތުގެ ބުނުމެވެ.
މެންދަމުން އަލިވެ ތިންގަޑިބައިވެ ބޮޑުވެއްޖެ އެވެ. ފަތިހުގެ ފިނިކަމަށް ދުނިޔެ ޒީނަތްތެރިކުރުމަށް މުޅި ކާއިނާތު ތައްޔާރު ވަނީ އެވެ. އަހަރެން މި އިނީ ބައްޕަގެ ގޭގެ ޓެރަސްގަ އެވެ. ސައިލެންޓްކޮށްފައި ޖީބުގައި އޮތް ފޯނުގައި ކިތަންމެ މިސްޑް ކޯލެއް ހުންނާނެ އެވެ. އެކަން ޔަގީންވާއިރުވެސް ޖީބުން ފޯނު ނުނަގަމެވެ. އަހަރެން މި އިންނަނީ ހަޔާތުގެ ދަތުރުގައި ދެން ދާންވީ މިސްރާބެއް ނުނިންމިފަ އެވެ.
އާއިލާގެ އެންމެ ހަގު މީހާއަށް ވުމަކީ މިހައި ދަތި އުނދަގޫ ކަމަކަށް ވެދާނެކަމަށް ދުވަހަކުވެސް ހީކުރެވިފައެއް ނެތެވެ. ކަމެއް ދިމާވި ވަގުތު ޒިންމާ މި އެޅުނީ އަހަރެންގެ ކޮނޑުގަ އެވެ. ބައްޕަ އެކަނިވެރި ކުރެވޭކަށް ނެތެވެ. އަންހެނުން މި ގެއަށް ބަދަލުކުރެވޭކަށްވެސް ނެތެވެ.
ބޮޑެއްޗަށް ތިބި މީހުން ވަރަށް 'ބިޒީ' އެވެ. މިރޭވެސް ބައްޕަ ގެއަށް ގެނައުމާއެކު އެމީހެއްގެ ގެއަށް ދިއުމަށް އަވަސްވެގަތީ، އަހަރެންގެ ކޮނޑުގައި އަތް ތަޅާލާފަ އެވެ. އޭގެ މާނައަކީ ކޮބައި ހެއްޔެވެ؟ އަހަރެން ބައްޕައާއެކު ވަގުތު ހޭދަކުރަން މި އަންނަނީ އެމީހުންގެ ފަރާތުން ހާޒިރީ މާކު ކުރާކަށް ނޫނެވެ. އަހަރެންގެ ބައްޕައަށް އަހަރެންގެ ބޭނުން ޖެހުނު އެންމެ މުހިއްމު ވަތުތަކީ މިއީކަން ވިސްނޭތީ އެވެ.
ކުރިން އަހަންނަކީ 'މަންމަގެ ބޯއީ' އެކެވެ. މުސްތަގުބަލުގައި 'ބައްޕަގެ ބޯއީ' އަކަށް ވުމަށް އަހަރެން ތައްޔާރެވެ.
މަންމައާއި ބައްޕަ ދަސްކޮށްދިނީ އެވަގުތެއްގައި އެންމެ މުހިއްމު ކަމަކަށް އިސްކަން ދިނުމަށެވެ. އަބަދުވެސް އެންމެ މުހިއްމު ހާލަތުގެ މަސްލަހަތު އިސްކުރާން މަންމަ ދިން ނަސޭހަތް އަހަރެންގެ ހިތަކުން ނުދާނެ އެވެ. މަންމައާއި ބައްޕަ ދޫކޮށް ޒިމާލްއާއެކު އެހެން ތަނެއްގައި ދިރިއުޅުމަށް އަހަރެން އެއްބަސްވީ 'ދެމަފިރިންގެ މަސްލަހަތަށް ވުރެން' މުހިއްމު އެހެން ކަމެއް ހަޔާތުގައި އޮވެގެން ނުވާނެކަމަށް މަންމަ ނަސޭހަތް ދިނުމުންނެވެ.
އެކަމަކު އެ ދުވަހުގެ ނަސޭހަތް އަޑު ނޭހިނަމަ، ބައްޕަގެ ކަރުނައިގެ ޒިންމާ އަމިއްލަ ބޮލުގައި މިއަދު އަހަރެން ނޭޅުވީސްކަން ކަށަވަރެވެ. ދެން ތިބި ބޭބެއިންނާއި މެދު އަހަރެންގެ ޝަކުވާއެއް ނެތެވެ. އަހަރެންގެ ޒިންމާ ނުނެގުމުގެ ހިތި ކަރުނަ އަޅަން އަހަރެން ތައްޔާރެވެ.
އެކަމަކު ވަގުތު ފާއިތުވެއްޖެ އެވެ. އަހަރުމެން ދޫކޮށް ﷲގެ ހަޒްރަތަށް މަންމަ ދަތުރުކޮށްފި އެވެ. ބައްޕަ އެކަނި ވެއްޖެ އެވެ. އެ ހާލުގައި ބައްޕަ ބަހަށްޓާފައި، އަންހެނުންގެ ބޮޑު އާއިލާއާއެކު އެގެއަށް ގޮސް، ކިންގް ސައިޒް އެނދުގައި އަހަރެން ނިދަން އޮވެ ދެ ލޯ މަރައިލާނީ ކޮންފަދައަކުން ހެއްޔެވެ؟ މަންމަ ދުނިޔޭގައި ހުރިނަމަ އަހަރެން 'ގެއަށް' ފޮނުވާނެ އެވެ. ބައްޕަގެ ބަސް އަހައިގެން ގެއަށް ދިޔައީ ހިތްހަމަޖެހިގެން ނޫނެވެ.
މިރޭގެ ހާދިސާއަށްފަހު އަހަރެންގެ ހިތް ޒަހަމްވެއްޖެ އެވެ. ހަތްވަނަ ވިލޭރެއިން ފެށިގެން މި ރޭގެ އެ ވަގުތާއި ހަމައަށް ބައްޕަ އުޅުނީ ކޮން ހާލެއްގައި ތޯ، އެހެން އެއްވެސް ދަރިޔަކު ސުވާލުވެސް ނުއުފައްދަނީ ބާވަ އެވެ! ތައުލީމާއި ތަހުޒީބާއި ތަނަވަސްކަމާއި އާރާއި ބާރަކީ މިހައި ހުތުރު އެއްޗަކަށް ވެދާނެކަމަށް މަންމަ އަހަރެން ގާތުގައި ނުބުނީ ކީއްވެ ބާ އެވެ؟ އެކަމަކު އަބަދުވެސް މަންމަ ބުނެދޭ ޖުމުލައެއް މި ފަހަކަށް އައިސް ސިކުނޑީގައި ވަރަށް ގިނަ ފަހަރު ތަކުރާރުވެ އެވެ.
"ދަރިފުޅާ، ސިޑިން މައްޗަށް އަރަމުން ދާއިރު ދިމާވާ ކޮންމެ މީހަކަށް ހިނިތުންވާށެވެ. އެ ސިޑިން ފައިބަން ޖެހޭ ދުވަހު ހަމަ އެމީހުންނާއި ދިމާވެދާނެއެވެ!"
އޭގެ މާނައަކީ ކޮބައި ބާ އެވެ؟ އެ ސުވާލު މަންމައާއި އަހަރެން ނުކުރަމެވެ. ކޮންމެ ސިޑިއަކުން އެރިޔަސް، ލިފްޓަކަށް ވަނަސް، އަހަރެންނާއި މޫނު ދިމާވާ ކޮންމެ މީހަކަށް ހިނިތުންވުން ރައްދުކުރަމެވެ. މިރޭގެ ހާދިސާއަށްފަހު އިތުރު މާނައެއް އެއިން ވިސްނިއްޖެ އެވެ.
ކޮންމެ ކާމިޔާބަކަށް ކުރަމުންދާ ދަތުރުގައި ތިމާއާއެކު ހިއްސާވި ކޮންމެ މީހަކަށް އިހްތިރާމް ކުރާށެވެ. އަތުގައި ހިފައި ކޮޅަށް ނެގި ކޮންމެ މީހަކަށް ރަހުމު ކުރާށެވެ. ކާމިޔާބުގައި އަބަދު ދެމިނުހުރެވިދާނެ އެވެ. ނާކާމިޔާބުގައި އިސްޖަހައިގެން ނިކުންނާނީ ހަމަ އެ ދޮރުންނެވެ. ނުވަތަ ފައިބާނީ އެދުވަހު މައްޗަށް އެރި ސިޑިންނެވެ. އެމީހުނަށް ހިނިތުން ނުވި ނަމަ، ނޫނީ އިހްތިރާމް ނުކުރިނަމަ އަހަރެންގެ ދަތި ވަގުތުގައި އެހީތެރިވާނެ ހަމަ އެކަކުވެސް ނުހުންނާނެ އެވެ.
މިވަގުތު އަހަރެންގެ ހާލަކީ އެއީ އެވެ. ދުނިޔެ ދެކުނީ މަންމަގެ ލޮލުންނެވެ. ކުރިއަށް ފިޔަވަޅު އެޅީ ބައްޕަގެ އިނގިލިތަކުގައި ހިފައިގެންނެވެ. މަންމައާއި ބައްޕައަށް އަހަރެންގެ ބޭނުން ޖެހުނު ވަގުތުގައި އަހަރެން ކޮބައި ހެއްޔެވެ؟ މަންމައާއި ބައްޕަގެ އަނެއް ހަތަރު ފިރިހެން ދަރީން ކޮބައިހެއްޔެވެ؟ ހާޓް އެޓޭކްއަކީ ސަބަބެއް ނެތި ކުއްލިޔަކަށް ކުރިމަތިވާ ނުރައްކަލެއް ނޫނެވެ. މަންމަގެ ހިތަށް އެވަރުގެ ރިހުމެއް ލިބުނީ ދަރީން ނޫން ދެން ކާކުގެ ނުވަތަ ކޮންބައެއްގެ ކިބައިން ހެއްޔެވެ؟ އެވޯޑް ރަސްމިއްޔާތުގައި ލައިފްޓައިމް އެޗީވްމެންޓް އެވޯޑް ބަލައި އެރި މީހާއެކޭ އަހަރެންގެ ތިއްތިބެއެކޭ ހުރި ތަފާތަކީ ކޮބައިހެއްޔެވެ؟ އޭލެވެލް ނިންމާފައި ރާއްޖެއިން ފުރިގޮތަށް އެއައީ މަންމަގެ ޖަނާޒާއަށެވެ. އޭނާއަށް އާދެވުނުއިރު އެކަންވެސް ނިމިއްޖެ އެވެ. މަންމަގެ މޫނުވެސް ނުފެނުނެވެ. (ނުނިމޭ)
