ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، ޕޭޕަލްއަކީ ރައީސްގެ ވައުދުފުޅެއް ކަމަށާއި ރައީސްގެ މެނިފެސްޓޯގައި ވެސް ހިމެނޭ ކަމެއް ކަމަށާއި އެހެންކަމުން އެ މަސައްކަތް ވަރަށް ބާރު ސްޕީޑުގައި ކުރިއަށްދާ ކަމަށެވެ.
މިނިސްޓަރު ވިދާޅުވީ، ޕޭޕަލް ހިދުމަތް ފަށަން ނިންމާފައިވާ ގޮތުގެ ޓައިމްލައިނެއް ވެސް ވަރަށް އަވަހަށް ހިއްސާކުރައްވާނެ ކަމަށާއި އެކަން ކުރަން ލަސްވަނީ، ޕޭޕަލް ރާއްޖެއަށް ތައާރަފް ކުރުމުގެ ޓެސްޓިން މަރުހަލާތައް ކުރިއަށްދާތީ ކަމަށެވެ.
ރާއްޖެއަށް ޕޭޕަލް ގެނައުމަށް އެ ކުންފުންޏަށް ޕްރޮޕޯސަލް ހުށަހަޅާފައިވާ ކަމަށް މިނިސްޓަރު ސައީދު ވިދާޅުވެފައިވަނީ 2024 ވަނަ އަހަރުގެ އޮގަސްޓު މަހުގެ ތެރޭގައެވެ.
އެއަށް ފަހު، މިދިޔަ އޮކްޓޫބަރު މަހު، އުރީދޫ ފިންޓެކް އާއި ޕޭޕަލް ގުޅިގެން ވަނީ ރާއްޖޭގައި ޕޭޕަލްގެ ހިދުމަތް ފެށުމުގެ އިންތިޒާމުތައް ހަމަޖެހިފައިވާކަން އިއުލާނުކޮށްފަ އެވެ.
