މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް މުހައްމަދު މުއިއްޒު ވިދާޅުވީ މި ނިންމެވުމަކީ ގޯތި ދެދޮރުގެ ތަނަވަސްކަން ހުރިހާ ރައްޔިތުންނަށް ފަހިކޮށްދިނުމަށް ނިންމެވި ނިންމެވުމެއް ކަމަށެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވީ ދެމަފިރިންގެ ތެރެއިން އެކަކަށް ބޯހިޔާވަހިކަމެއް ލިބިފައި އޮތަސް ބޯހިޔާވަހިކަމަށް ޝަރުތު އާ އުސޫލުގެ ތެރެއިން މިހާރު ހަމަވާނެ ކަމަށެވެ.
މީގެއިތުރުން ޖޮއިންޓު ބޯހިޔާވަހިކަން ލިބިފައިވާ ފަރާތްތަކަށް ވަކިވަކިން ބޯހިޔާވަހިކަމަށް އެދެވޭނެ ގޮތެއް ހަދައި ދިނުމަށް ވަރަށް ގިނަ ފަރާތްތަކުން އެދެމުންދާކަން ފާހަގަކުރައްވަމުން މިނިސްޓަރު ވިދާޅުވީ ޖޮއިންޓުކޮށް ލިބިފައިހުރި ބޯހިޔާވަހިކަން ދޫކޮށްލަން އެންމެން އެއްބަސްވާނަމަ އެކަން އެގޮތަށް ކުރެވޭނެ ކަމަށެވެ.
"ބިންވެރިޔާ" ސްކީމުގެ ދަށުން އެހެން ފަރާތަކާ ގުޅިގެން ފޯމު ހުށަހަޅައިގެން ގޯތި ލިބުނު މީހުންގެ ތެރެއިން އެ ފޯމުގައި ގުޅިފައިވާ ހުރިހާ އެންމެން އެ ގޯތި އެއްކޮށް ދޫކޮށްލަން އެއްބަސްވާ ނަމަ، ގޯތި ލިބުނު ކޮންމެ މީހަކަށް ވަކި ގޯއްޗެއް ލިބޭ އުސޫލު ވެސް މިއަދު ވަނީ އާންމުކޮށްފަ އެވެ.
މި މަޝްރޫއުގެ ދަށުން ޖުމުލަ 15,000 ގޯތި ދޫކުރުމަށް ވަނީ ނިންމާފަ އެވެ. މިއީ ކޮންމެ ގޯއްޗަކީ 1,250 އަކަފޫޓުގެ ބިމެކެވެ. މީގެ ތެރެއިން މާލޭގެ ރަށްވެހިންނަށާއި ހާއްސަ އިސްކަންދޭ ކެޓަގަރީތަކަށް ގޯތި ދޫކުރާނީ ގްރޭޓަރ މާލޭ ސަރަޙައްދުންނާއި ރަސްމާލެއިންނެވެ. އަދި މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރާނީ ރަސްމާލެއިންނެވެ.
ފްލެޓް ދޫކުރުމަށް ހަމަޖެހިފައިވަނީ ޖުމުލަ 7,900 ފްލެޓެވެ. އެއީ މާލޭ ރަށްވެހިންނަށް 4,000 ފްލެޓް، މާލޭގައި ދިރިއުޅޭ އެހެން ރަށްރަށުގެ މީހުންނަށް 1,500 ފްލެޓް އަދި ހާއްސަ އިސްކަންދޭ ކެޓަގަރީތަކަށް 2,400 ފްލެޓް އެވެ.
