ބަސްމޮށުންތެރިކަމެއް ލިބިފައި ނުވިޔަސް ލޯތްބަކީ ގަދަ ބާރެކެވެ. އެއީ އެކި ރަހައިގެ އެކި ކުލައިގެ އަސަރުތަކުން ވިންދު ޖަހުވާލާ ރޫހާނީ ދިރުމެކެވެ. ލޯބީގެ އެންމެ ވޭން ހުރި ބާވަތަކީ ސިއްރު ލޯތްބެވެ. ހާމަކުރެވޭނެ ހާލަތެއް ނެތި، އުތުރި އަރަމުންދާ ޖަޒްބާތުތަކުގައި އަތް އެޅުން މަޖުބޫރުކުރުވުމަކީ އިންސާނެއްގެ ހިތަށް ކުޅަދާނަކަމަކަށް ނުވެ އެވެ.
ގުޅުމަކީ ދެހިތެއްގައި ޖަހާ ވިންދެކެވެ. އެވިންދު ދިރި، މޫ ލައި ހެދިބޮޑުވަނީ ދެމީހެއްގެ އިހްސާސްގައި އެއް ފުރާނައެއް އެޅިގެންނެވެ. އެކަކު ނެތި ދިއަޔަސް، ލޯތްބަށް ކުޑަވެސް ބަދަލެއް ނާދެ އެވެ. ދިރިހުރި އިންސާނާގެ ލޯބި އެހެން މީހަކާ ހިއްސާކުރިޔަސް، ފުރަތަމަ ލޯބީގެ ރާހަތެއް ނުލިބެ އެވެ. އެތަށް ޒަމާނަކަށް ދެމިގެން ދިއަޔަސް މިއީ ނިމުމެއް ނެތް އިހްސާސެކެވެ.
އަހަރެންގެ ހާލަތާއި، މި ހިތުގެ ވޭނާއި ޖަޒްބާތު މުޅިން ތަފާތެވެ. ލޯބިވެވުނީ މީހެއްގެ ފިރިއެއް ދެކެ އެވެ. އެއީ ކުޑަކުޑަ ދަރިއެއްގެ ބައްޕައެއްވެސް މެއެވެ. އަހަރެންގެ ލޯތްބާއި މި ހިތުގެ ހާލަތު އޭނާއަށްވެސް އަދި އެހެން އިންސާނަކަށްވެސް ނޭގޭނެ އެވެ.
އަހަރުތަކެއް ވަންދެން އަހަރެންގެ ލޯބި ފޮރުވައި ރައްކާކުރީމެވެ. މިހިތުގެ އެންމެ އަޑީގައި އެވެ. އެހެން މީހަކަށް ހަދިޔާކުރާނެ ކުޑަ ޖާގައެއްވެސް މި ހިތުގައި ނެތެވެ. މިއީ އެއްވެސް މީހެއްގެ ބައިވެރި ވުމެއް ނެތް ވޭންދެނިވި ސިއްރު ކެކުޅުންތަކެކެވެ. ރަޝްދާންގެ ހިތް އަހަރެންގެ މައްޗަށް ލެނބޭނެ ދުވަހަކަށް އަހަރެން އިންތިޒާރުކުރީމެވެ. ނަމަވެސް އެއީވެސް ފޮރުވުމެއްގެ ތެރެއިން ނެވެ. އަހަރެންގެ ރަހްމަތްތެރިޔަކު ގާތުގައިވެސް ރަޝްދާންގެ ނަން ނުގަންނަމެވެ.
ފުރަތަމަ ފަހަރަށް އަހަންނަށް ރަޝްދާން ފެނުނީ، ސައިކަލުގައި އަހަރެންގެ ކުރިކަނޑާލި ވަގުތު އެވެ. އެއީ މީގެ ހަތް އަހަރުވަރު ކުރިންނެވެ. ފުރަތަމަ ނަޒަރުން ލޯބި ވެވޭކަމަށް ފޮތްތަކުގައި ލިޔެފައި ހުއްޓަސް، އެ ދުވަހުގެ ކުރީން އެކަން އަހަރެން ގަބޫލެއް ނުކުރަމެވެ. އެއީ ކާކުކަމެއް؟ ކޮންތާކު އުޅޭ މީހެއްކަމެއް؟ ނުވަތަ އެއީ މި ރަށު މީހެއްކަމެއްވެސް އޭރު އަހަރެން ނުދަނެހުރީމެވެ. އަލިފު އަތޮޅު ރަސްދޫ ފަދަ ކުޑަ ރަށަކަށް ނިސްބަތްވިޔަސް، ގެއިން ބޭރަށް ނިކުމެ، ހަވީރު ފިންޏަށް ބުރުޖެހުމަކީ އަހަރެންގެ ޝައުގުވެރިކަމުގެ ލިސްޓުގައި ހިމެނިފައިވާ ކަންކަމެއް ނޫނެވެ. އަހަރެންގެ އުމުރުގެ ކުދިން ފިޔަވައި އިތުރު މާގިނަ ބަޔަކު އަހަރެން ނުދަންނަމެވެ.
އެދުވަހު ރަޝްދާން ފެނުނު ފަހުން، އޭނާ ދެކިލުމުގެ ޝައުގުވެރިކަން ބޮޑުވި އެވެ. ކޮންމެވެސް ވަރަކަށް ކުދިން ކައިރީގައި އަހައިގެން އޭނާގެ މައުލޫމާތު ހޯދީމެވެ.
ލިބުނީ އުފަލެއް ނޫނެވެ. ހިތްހަމަޖެހުމެއްވެސް ނޫނެވެ. ރަޝްދާން އުޅެނީ ކައިވެނިކޮށްގެންކަމާއި، އޭނާގެ ކުޑަކުޑަ ދަރިއަކު އޮންނަކަން އެނގުމުން އަހަރެންގެ ހިތް، ނުތަނަވަސްވި އެވެ. ދުވަހެއްގައިވެސް އޭނާގެ އެ އުފާވެރި ހަޔާތަށް ނިމުމެއް އަންނާން އަހަރެންގެ ހިތެއް ނުރުހުނެވެ.
ހިތުގައި އުފެދެމުން ތާޒަވަމުން ދިޔައީ ލޯބިކަމެއް ނުވަތަ އެއަށް ދޭނެ އެހެން ނަމެއް އަހަންނަކަށް ނޭގުނެވެ. އެ ނަމާއި އެ ސޫރަ ލޯ ކުރިމަތީން ފަނޑެއް ނުވި އެވެ. ލިބުނު ހަބަރާއެކުވެސް އަހަރެންގެ އިހްސާސްތަކަށް ބަދަލެއް ނައި އެވެ. ލޯބިވާ އިންސާނާ ދުރުދުރުން ފެނިލުމުން ލިބޭނެ ހުރިހައި ހިތްހަމަޖެހުމެއް އަހަރެން ހާސިލްކުރާން ނިންމީމެވެ. ކުރު މި ހަޔާތަށް އެވަރުވެސް ފުދޭކަމުގައި ހިތަށް ވިސްނައިދިނީމެވެ.
ރަޝްދާން އާއިމެދު ހިތުގައި އޮތް ގަދަރު ބޮޑުވީ، ޖެހިގެން އައި އީދު ދުވަހު އެވެ. ކުޅިވަރު ބެލުމަށްޓަކައި އަންހެނުންނާއި ދަރިފުޅާއެކު ހުއްޓި ހުރީ އަހަރެން ދާދި ގާތުގަ އެވެ. އެނބުރެލި ގޮތަކުން އޭނާގެ ކޮނޑުން އަހަރެންގެ ގައިގައި ޖެހުނު ވަގުތު މައާފަށް އެދުނު ރީތި ގޮތް، ދުވަހަކުވެސް މި ދެ ލޮލުގެ ނޫރުން ފަނޑެއް ނުވާނެ އެވެ.
ރަށުގެ އާންމު ފިރިހެނުން ބަލައިލާފަދަ ނަޒަރަކުން އަހަރެންނާއި ދިމާއަށް އެންމެ ފަހަރަކުވެސް ރަޝްދާން ބަލައި ނުލި އެވެ. އަހަރެންނާއި އެއްވަރަށް ނުވަތަ އަހަންނަށްވުރެން ދޮން އަންހެން ކުއްޖަކު އަހަރުމެން ރަށުގައި ނޫޅޭކަމަށް ކިތަންމެ މީހަކު ބުނެ އެވެ. ދޮންކަމާއި އެއްވަރަށް އަހަރެންގެ ވަނާތަކާއި ބުރުސޫރައިގެ ފުރިހަމަ ވާހަކައަކީ ރަށުގެ ޒުވާނުން ތެރޭގައި މަގްބޫލު މައުލޫއު އެކެވެ. އެއިން އެއްވެސް ކަމަކަށް ރަޝްދާންގެ ސަމާލުކަމެއް ނެތެވެ. އެއީ މާތް އިންސާނެއް ކަމުގައި އަހަރެން ނިންމީ އެދުވަހު އެވެ.
އޭނާގެ އަންހެނުންނާއި ދަރިފުޅުވެސް އެދުވަހު ދުށީމެވެ. ހިތުގައި ހަސަދައެއް ނެތި، ސާފު އިބާރާތުން އިންސާފަށް އެއްޗެއް ބުނާނަމަ ބުނެވޭނީ، ރަޝްދާންއާއި ބަލާފައި އޭނާގެ އަންހެނުންނަކީ ރީތި މީހެއް ނޫންކެމެވެ. ފެންނަ ފެނުމަށް ހިތްހެޔޮގޮތެއްވެސް އަހަންނަކަށް ފާހަގައެއް ނުކުރެވުނެވެ. އަހަރެންގެ ކިބައިން ރަޝްދާން މައާފަށް އެދުނު ވަގުތު އަހަންނާއި ދިމާއަށް ހަޔާތު ދެ ލޯ ވައްކޮށްލާފައި ބަލައިލާންޖެހޭ އެއްވެސް ސަބަބެއް ހަގީގަތުގައި ނެތެވެ. އޭނާގެ ގައިގައި ޖެހިގަތީ އަހަންނެއް ނޫނެވެ. އަހަރެންގެ ގައިގައި ރަޝްދާން ޖެހިގަތީވެސް ގަސްތަކު ނޫނެވެ.
ކޮންމެއަކަސް ރަޝްދާންގެ ދަރިފުޅު ވަރަށް ލޯތްބެވެ. އެފަދަ ލޯބި ކުއްޖަކު ފެނުމުން، ކޮންމެ މީހަކުވެސް އެކުއްޖަކަށް ހިނިތުންވާނެ އެވެ. އަހަރެންގެ ހިނިތުންވުމުގައިވެސް ފޮރުވިފައިވާ އެއްވެސް މާނައެއް ނޯންނާނެ އެވެ. އަހަރެންގެ ހިނިތުންވުމަށް ކުޑަކުޑަ ކުއްޖަކު ޖަވާބު ދިނުމަށް ރައްދުގައި ހިނިތުންވުމުން އެ ދަރިފުޅުގެ ކޮލުގައި ފިރުމާލީމެވެ. އެވަގުތު އަހަރެންގެ އަތް އެކުއްޖާގެ ކިބައިން ހަޔާތު ފޮޅުވައިލުމުގައި އޮތީ އެންމެ ސަބަބެއްކަމަށް އަހަންނަށް ވިސްނުނީ ފަހުންނެވެ. އެ ދަރިފުޅު އިނީ ރަޝްދާންގެ އުރުގައި އެވެ. އެދުވަހުގެ ފަހުން ރަޝްދާން ފެންނަ ކޮންމެ ތަނަކުން އަހަރެން ހިނިތުންވަމެވެ. މީހުން އެއްވެ، ރަށުގައި ބާއްވާ އެކިއެކި ކަންކަމަށް އަހަރެންވެސް ނިކުންނާން ފެށީމެވެ. ހަމަ އެންމެ މަގުސަދެއްގަ އެވެ. ރަޝްދާންއާއި ރަހުމަތްތެރިވުމުގެ އަޒުމުގައި އެވެ.
އުނދަގުލަކާއި ނުލައި އެކަން ކާމިޔާބުވި އެވެ. އެ މިންވަރު އަހަންނަށް ފުދެ އެވެ. އެ ރޮނގު ހުރަސްކޮށް އެއަށްވުރެން އެތެރެއަށް ވަނުމުގެ އެއްވެސް މަގުސަދެއް އަހަރެންގެ ނެތެވެ. ދެމީހުންގެ އެކުވެރިކަން ބަދަހިވި ސަބަބަކީވެސް ދެފަރާތުގެ ހިތް ސާފުކަން ކަމުގައި ފަހަރެއްގައި ވެދާނެ އެވެ. ދަރިފުޅާއި އަންހެނުން ދެކެ ރަޝްދާން ވާ ލޯބި އެންމެ ރަގަޅަށް އެނގޭނެ އެކަކީވެސް މިހާރު އަހަރެންނެވެ. އަހަރެން ނޫން އިތުރު ރައްޓެއްސަކާއި އޭނާގެ އަމިއްލަ ވާހަކަތަށް ރަޝްދާން ހިއްސާ ނުކުރާތީ އެވެ.
ވަރަށް ކުއްލި ގޮތަކަށް ހަޔާތު ނިޔާވެއްޖެ ކަމުގެ ހަބަރު ލިބުނީ އޮންލައިން ކޮށް އަހަރެން ކިޔަވަމުންދިޔަ ކޯހުގެ ޓެސްޓް ހެދުމަށް މާލެ އައިސްހުރި ވަގުތެއްގަ އެވެ. ޖެހިގެން އައި ދުވަހު ޓެސްޓް ނިމުމާއެކު އަހަރެން ރަށަށް ދިޔައީ ރަޝްދާންއަށް އަހަރެން ފަދަ އެކުވެރިއެއްގެ ބޭނުން ޖެހިފައިވާތީ އެވެ.
ރަޝްދާންއާއި ހަޔާތުގެ ކައިވެނި ކުރެވުނީ ދެ އާއިލާވެސް ނުގަބޫލެވެ. ދެ އާއިލާގެ އެހީއަކާއި ނުލައި ރަޝްދާން ދިރިއުޅުން އާރާސްތުކުރި ސަބަބަކީވެސް އެއީ އެވެ. ރަޝްދާންއަކީ ރަށުގެ ބޮޑު އާއިލާއެއްގެ މެންބަރެކެވެ. އޭނާއަކީ މިނިވަން ހިޔާލުގެ މިނިވަންކަމަށް އިހްތިރާމްކުރާ، އެހެން މީހުންގެ ދަށުވާން ބޭނުން ނުވާ މީހެކެވެ. ވަރަށް ރަގަޅަށް އެކަން އަހަރެން ގަބޫލުކުރަމެވެ. އޭނާގެ ދަރިފުޅު އެ އާއިލާގެ ނުވަތަ، ހަޔާތުގެ އާއިލާގެ އެއްވެސް މީހަކާ ހަވާލު ނުކުރާނެކަން އަހަންނަށް ކަށަވަރެވެ. (ނުނިމޭ)
