މިއަހަރުގެ ރޯދައިގެ ދެވަނަ ހަފްތާ ނިމުމުނުއިރު ހަފްތާގައި މާލޭ ސަރަހައްދުގައި 122 އެކްސިޑެންޓް ހިނގާފއިވާކަމަށް ފުލުހުންގެ ހިސާބުތަކުން ދައްކައެވެ. މީ މި ރޯދަމަހުގެ ފުރަތަމަ ހަފްތާއާއި އަޅާކިޔާއިރު 15 އެކްސިޑެންޓް އިތުރު އަދަދެކެވެ. މި ރޯދައިގެ ފުރަތަމަ ހަފްތާގައި ހިނގީ 107 އެކްސިޑެންޓްކަމަށް ފުލުހުން ވަނީ ބުނެފައެވެ.
ރޯދަމަހުގެ ދެވަނަ ހަފްތާގައި އެންމެ ގިނަ އެކްސިޑެންޓް ހިނގާފައިވަނީ ހުޅުމާލޭ ފޭސް އެކެެއްގައެވެ. ފޭސް އެކެއްގައި ޖުމްލަ 35 އެކްސިޑެންޓް ވެފައިވާކަމަށް ފުލުހުންގެ ހިސާބުތަކުން ދައްކައެވެ. ފުލުހުންގެ ރިކޯޑްތައް ދައްކާގޮތުން ރޯދަމަހުގެ ފުރަތަމަ ހަފްތާގައި މާލޭ ސަރަހައްދުގައި އެންމެ އެކްސިޑެންޓް ގިނައީ މަޖީދީ މަގާއި ސިނަމާލެ ބްރިޖާއި ހައިވޭގައެވެ. އެގޮތުން ސިނަމާލެ ބްރިޖާއި ހައިވޭގައި 19 އެކްސިޑެންޓް ހިނގާފައިވާއިރު މަޖީދީމަގުގައިވެސް ރޯދަމަހުގެ ފުރަތަމަ ހަފްތާގައި ވަނީ 19 އެކްސިޑެންޓް ހިނގާފައެވެ.
ފުލުހުންގެ ހިސާބުތައް ދައްކާގޮތުން މިދިޔަ ރޯދަމަހުގެ ދެވެނަ ހަފްތާގައިވެސް ހުޅުމާލޭ ފޭސް އެކެއްގައި ވަނީ ގިނަ އެކްސިޑެންޓްތަކެއް ހިނގާފައެވެ. އެގޮތުން މިދިޔަ ރޯދަމަހުގެ ދެވަނަ ހަފްތާގައި ހުޅުމާލޭ ފޭސް އެކެއްގައި ވަނީ 37 އެކްސިޑެންޓް ހިނގާފައެވެ.
މި ރޯދަމަހުގެ ފުރަތަމަ ހަފްތާހައި ހިނގި ނުރައްކާތެރި އެކްސިޑެންޓެއްގައި 16 އަހަރުގެ ކުއްޖަކު ވަނީ މަރުވެފައެވެ. މާލޭގައި ހިނގި މި އެކްސިޑެންތްގައި މަރުވީ ސައިކަލުގެ ފަހަތުގައި އިން ކުއްޖާއެވެ. ސައިކަލް ކުރީގައި އިން 19 އަހަރުގެ ކުއްޖާއަށްވެސް ވަނީ މި އެކްސިޑެންޓް ޒަހަމްވެފައެވެ.
