މި ސްކީމްގެ ދަށުން މިހާ އަވަސް ސްޕީޑެއްގައި މަޝްރޫއުތައް ފެށިގެން މި ދަނީ ރައީސް މުހައްމަދު މުއިއްޒުގެ ވަރުގަދަ ލީޑާޝިޕްގެ ސަބަބުން ކަންކަން ކުރުމަށް ވާ ފަސޭހައަކުން ކަމަށް ވެސް ޝަރީފް ވިދާޅުވި އެވެ.

ބީއެމްއެލް އިން ހިންގާ މި މަޝްރޫއުގެ ދަށުން ވިލިމާލެ އާއި ހުޅުމާލެ 1 އަދި ހުޅުމާލެ 3 ގައި 3،260 ފްލެޓު އިމާރާތްކުރާނެ އެވެ.

އެ މަޝްރޫއުގެ ދަށުން ބައެއް ފްލެޓު އަޅަން ހަވާލުކޮށްފައި ވަނީ ރާއްޖޭގައި ބޮޑެތި ބައެއް މަޝްރޫއުތައް ހިންގަމުން އަންނަ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ)އާ އެެވެ. އަދި ބައެއް ދިވެހި ކުންފުނިތަކާ ވެސް ވަނީ ފްލެޓު އަޅަން ހަވާލުކޮށްފަ އެވެ. 

ބީޔޫސީޖީއާ ހަވާލުކުރީ ހުޅުމާލޭ ޒޯން 2ގެ ޖުމްލަ 13،475 އަކަފޫޓުގެ ސަރަހައްދެއްގެ ހަތަރު ބިމެއްގައި 1،117 ހައުސިން ޔުނިޓު އިމާރާތް ކުރާށެވެ. ވިނަރެސް ފްލެޓުތަކުގެ މަސައްކަތް ނިންމި އަދި ގުޅިފަޅާއި ހުޅުމާލޭ 2ގެ އިންފްރާސްޓްރަކްޗާގެ މަސައްކަތްތަކެއް ވެސް ކުރަމުން އަންނަ ސީއެމްއީސީން އިމާރާތް ކުރާނީ 1،224 ހައުސިން ޔުނިޓެވެ.

ހެޔޮ އަގެއްގައި ހައުސިން ޔުނިޓު ދިނުމަށް، ހައުސިން މިނިސްޓްރީގެ އެހީތެރިކަމާ އެކު، ބީއެމްއެލް އިން ނިންމާފައިވަނީ ހައުސިން ޔުނިޓްތައް ހަދައި، ލީސް-ޓު-އޯން (ކުލި ދައްކައި ހަލާސް ކުރުމުން މިލްކުވުން) މޮޑެލްގެ ދަށުން އާންމުންނަށް ހުޅުވައިލުމަށެވެ.