އެމެރިކަން ކޮލެޖް އޮފް ކާޑިއޮލޮޖީ އިން ކުރިއަށް ގެންދިޔަ މި ދިރާސާގައި ބުނާ ގޮތުން، އަލްޓްރާ ޕްރޮސެސްޑް ކާނާ ނުވަތަ އާދައިގެ ޖަންކް ފުޑް ބޭނުންކުރުމުން ހާޓް އެޓޭކް ޖެހުމާއި ސްޓްރޯކް ފަދަ ނުރައްކާތެރި ބަލިތައް ޖެހުމުގެ ފުރުސަތު 67 ޕަސަންޓަށް އިތުރުވެއެވެ. މިއީ 6،800 އަށް ވުރެ ގިނަ މީހުން ބޭނުންކޮށްގެން ގިނަ ދުވަސްތަކެއް ވަންދެން ހެދި ދިރާސާއެކެވެ.
މި ދިރާސާގެ ހޯދުންތަކުން އެނގޭ ގޮތުގައި، ކޮންމެ ދުވަހަކު އިތުރަށް ބޭނުންކުރާ މިފަދަ ކާނާގެ ކޮންމެ މިންވަރަކާ އެކު ބަލީގެ ނުރައްކާ 5.1 ޕަސަންޓު އިތުރުވެގެންދެއެވެ. މިފަދަ ކާނާގެ ތެރޭގައި ހިމެނެނީ ޕެކެޓްކޮށްފައި ހުންނަ ސިޕްސް އާއި، ފޮނި ބުއިންތަކާއި، ޕްރޮސެސްޑް މީޓް އަދި ހެނދުނުގެ ނާސްތާގައި ބޭނުންކުރާ ބައެއް ކަހަލަ ސީރިއަލް އެވެ. މި ތަކެއްޗަކީ އާންމުކޮށް ގޭގޭގައި ބޭނުންކުރާ "އާދައިގެ" ތަކެތި ކަމަށް ފެނުނު ނަމަވެސް، މިއީ ހަށިގަނޑަށް ބޮޑެތި ގެއްލުންތައް ދޭ ތަކެއްޗެވެ.
މިކަމާ ގުޅޭގޮތުން ސިއްހީ މާހިރުން ބުނަނީ މިފަދަ ކާނާތަކުގައި ހިމެނޭ މާއްދާތަކުން ހަށިގަނޑު ދުޅަވުމަށާއި، ބަރުދަން އިތުރުވުމަށް މަގުފަހިވާ ކަމަށެވެ. "އަހަރެމެން ކާ އާދައިގެ ބައެއް ހެދިކާތަކާއި ބުއިންތަކަކީ އޭގެ ހަގީގަތް އޮޅޭގޮތަށް ބާޒާރުގައި ހުންނަ ތަކެތި. މިއީ ހިތުގެ ސިއްހަތަށް އޮތް ވަރަށް ބޮޑު ނުރައްކަލެއް،" ކަމަށް ޑޮކްޓަރުން ފާހަގަކުރެއެވެ. މީގެ އިތުރުން މިފަދަ ކާނާތަކުގައި ހަކުރާއި ލޮނުގެ މިންވަރު އިންތިހާއަށް ގިނަކަން ވެސް މާހިރުން ފާހަގަކުރެއެވެ.
ކާނާގެ ބާވަތްތައް އިހުތިޔާރު ކުރާއިރު ބޭރުގައި ޖަހާފައި ހުންނަ ލޭބަލްތަކަށް ބެލުމަކީ މުހިންމު ކަމެކެވެ.
ބައެއް ކާނާގައި ހިމެނޭ ކެމިކަލްތަކަކީ ހަށިގަނޑުގެ އިންސިއުލިން މަސައްކަތް ކުރުމަށް ހުރަސްއަޅާ ތަކެއްޗެވެ. އެހެންކަމުން ތާޒާ "ކާނާއަށް އިސްކަންދިނުމަކީ ހިތުގެ ބަލިތަކުން ރައްކާތެރިވުމަށް އޮތް އެންމެ ރަނގަޅު ގޮތް،" ކަމަށް ޑޮކްޓަރުން ބުނެއެވެ.
މި ދިރާސާއިން ދައްކާ ގޮތުގައި މިފަދަ ކާނާ ބޭނުންކުރުން މަދުކޮށްލުމަކީ ވެސް ސިއްހީ ގޮތުން ބޮޑު ކުރިއެރުމެއް ލިބޭނެ ކަމެކެވެ.
