މާލޭގެ އެކި އަވަށްތަކުން މާލޭ ސިޓީ ކައުންސިލަށް މޭޔަރު ނުލާ ޖުމްލަ 17 މެމްބަރުން އިންތިހާބުކުރެއެވެ. ވަގުތީ ނަތީޖާ ދައްކާގޮތުން އޭގެތެރެއިން 16 ދާއިރާ ކާމިޔާބުކޮށްފައިވަނީ އިދިކޮޅު އެމްޑީޕީންނެވެ. އެ ޕާޓީއަށް ނުލިބުނު ހަމައެކަނި ގޮނޑިއަކީ ވިލިމާލެ ދާއިރާގެ ގޮނޑިއެވެ. އެ ގޮނޑި ކާމިޔާބުކުރީ ވެރިކަން ކުރާ ޕީއެންސީގެ ޓިކެޓްގައި ނުކުތް އިބްްރާހިމް ސަމާހުއެވެ.
މާލޭ ސިޓީގެ އަންހެނުން ތަރައްޤީއަށް މަސައްކަތް ކުރާ ކޮމެޓީގެވެސް އެންމެ ގޮނޑިއެއް ފިޔަވާ ހުރިހާ ގޮނޑިއެއް ކާމިޔާބުކުރީ އިދިކޮޅު އެމްޑީޕީންނެވެ. މާލޭ ސިޓީ އަންހެނުން ތަރައްގީއަށް މަސައްކަތްކުރާ ކޮމެޓީގެ ރައީސް ހިމެނޭ ގޮތަށް އެމްޑީޕީއަށް 17 ގޮނޑި ވަނީ ލިބިފައެވެ. އަންހެނުން ތަރައްގީއަށް މަސައްކަތް ކުރާ ކޮމެޓީންވެސް އެމްޑީޕީއަށް ނުލިބުނީ ވިލިމާލެ ދާއިރާގެ ގޮނޑި އެކަންޏެވެ. އެ ގޮނޑި ކާމިޔާބުކުރީ ވެރިކަން ހިންގާ ޕީއެންސީން ނުކުތް ކެންޑިޑޭޓް ހިޝްމާ އަހްމަދުއެވެ.
ވިލިމާލެ ދެ ގޮނޑި ކާމިޔާބުކުރި ޕީއެންސީ ކެންޑިޑޭޓުން
މާލޭގެ މޭޔަރުކަމުގެ ގޮނޑި އެމްޑީޕީން ދިފާއުކޮށްފައިވަނީ ސަރުކާރު ކެނޑިޑޭޓާއި ވާދަކޮށްް ބޮޑު ތަފާތަކުންނެވެ. ވަގުތީ ނަތީޖާ ދައްކާގޮތުން މިހާރު މޭޔަރު އާދަމް އާޒިމް އެ ގޮނޑި ކާމިޔާބުކުރީ 45.2 އިންސައްތަ ވޯޓް ހޯދައިގެންނެވެ. އެއީ 13,731 ވޯޓެވެ.
މާލޭ ސިޓީގެ އަންހެނުން ތަރައްގީއަށް މަސައްކަތްކުރާ ކޮމެޓީގެ ރައީސްކަން ކާމިޔާބުކުރެއްވި ރީޝާ
މާލޭ ސިޓީގެ އަންްހެނުން ތަރައްގީއަށް މަސައްކަތް ކުރާ ކޮމެޓީގެ ރައީސްކަންވެސް ކާމިޔާބުކުރީ އެމްޑީޕީންނެވެ. ސަރުކާރު ހިންގާ ޕީއެންސީގެ ކެންޑިޑޭޓް އާޝިޔަތު އަލައިކާ ވާދަކޮށް އަންހެނުން ތަރައްގީއަށް މަސައްކަތް ކުރާ ކޮމެޓީގެ ރައީސްކަން ނެގީ އެމްޑީޕީގެ ފަރާތުން އައިޝަތު ރީޝާއެވެ.
