ހުރާގައި ހިނގި މި އަލިފާނުގެ ހާދިސާ ފުލުހުންނަށް ރިޕޯޓްކުރީ ރޭ 01:18 ހާއިރު އެވެ. އަލިފާން ރޯވެފައިވަނީ އެރަށު "ނޫފަރު" ގޭގަ އެވެ.
މި ހާދިސާއާ ބެހޭގޮތުން ހުރާ ކައުންސިލްގެ ރައީސް އީސާ އަހްމަދު "ސީއެންއެމް" އަށް ވިދާޅުވީ، އަލިފާން ރޯވީ އެ ކޮޓަރީގައި އޮތް ފޯނެއް ހޫނުވެ އޭގައި ހުޅު ހިފައިގެން ކަމަށާއި، އެ ވަގުތު އެ ތަނުގައި އަންހެނަކާއި އޭނާގެ ދެ ދަރަން ނިދާފައި ތިބި ކަމަށެވެ. އަދި އަންހެން މީހާއަށް ހޫނު ވާތީ ހޭލެވުނު އިރު ފޯނު ބާއްވާފައި އޮތް ބާލީހުގައި ރޯވެފައިވާ ކަމަށް އީސަ ވިދާޅުވި އެވެ. އެވަގުތު އެގޭ އިތުރު މީހަކު އެތެރެއަށް ވަދެ، ނިދާފައި ތިބި ދެ ކުދިން ބޭރަށް ނެރެ ސަލާމަތްކުރި ކަމަށް އޭނާ މައުލޫމާތުދެއްވި އެވެ.
އީސަ ވިދާޅުވީ އެގޭގައި އަލިފާން ރޯވުމާއެކު ރައްޔަތުން ނުކުމެ ވަގުތުން އަލިފާން ނިއްވުމުގެ މަސައްކަތް ފެށި ކަމަށާއި، ގިނަ ބައެއްގެ ބައިވެރިވުމާއެކު، ގޭގެއިން ފެން ހޮޅި ނެރެގެން ގަޑިއިރެއްހާއިރު ތެރޭގައި އަލިފާން ނިއްވާލެވުނު ކަމަށެވެ. އެ ހާދިސާ ހިނގި ވަގުތު ރަށުގެ ރައްޔިތުންގެ ފަރާތުން ލިބުނު ފުރިހަމަ އެހީތެރިކަން އީސަ ވަނީ ފާހަގަކުރައްވާފަ އެވެ.
އީސަ ވިދާޅުވި ގޮތުގައި، އެ ގޭގެ ފުރާޅުން ޓިނު ނަގައިގެން އެތެރެއަށް ފެން ޖަހައިގެން އަލިފާން ނިއްވާލި އިރު، އެ ކޮޓަރި އާއި ސިޓިންރޫމް ވަނީ ބޭނުންނުކުރެވޭ ވަރަށް އަނދާފަ އެވެ.
ހުރާގައި ރޯވި ގެ - ފޮޓޯ: އެންޑީއެމްއޭ
އަލިފާނުގެ ހާދިސާގައި އަނިޔާވި އަންހެން މީހާގެ އަތް ފިހިފައިވީ ނަމަވެސް، އޭނާއަށް ބޮޑަށް ގެއްލުން ލިބިފައިވަނީ ނަފްސާނީ ގޮތުން ކަމަށް އީސަ ވިދާޅުވި އެވެ. އެގޮތުން، އޭނާއަށް ލިބުނު ކުއްލި ޝޮކާ ގުޅިގެން ވާހަކަ ނުދެއްކޭތީ ހުރާ ސިއްހީ މަރުކަޒުގައި ފަރުވާ ދިނުމަށް ފަހު މާލެ ގެންސް އޭޑީކޭ ހޮސްޕިޓަލްގައި ފަރުވާދެމުން އަންނަ ކަމަށާއި، މިހާރު އޭނާގެ ހާލު ރަނގަޅުވަމުން އަންނަ ކަމަށް އީސަ މައުލޫމާތުދެއްވި އެވެ.
އީސަ އިތުރަށް ވިދާޅުވީ، ފުލުހުންގެ ތަހުގީގަށް ރޯވި ގެ ބަލަމުންދާތީ އެ ގޭތެރެ ސާފު ކުރުމުގެ މަސައްކަތް އަދި ނުފެށޭ ކަމަށެވެ.
މި ހާދިސާ ހިނގި ގޭގައި ދިރިއުޅުނު 15 މީހަކަށް އިންސާނީ އެހީތެރިކަން ފޯރުކޮށްދިނުމުގެ މަސައްކަތް، ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އާއި ހުރާ ކައުންސިލް ގުޅިގެން ދަނީ ކުރަމުންނެވެ. އެގޮތުން ކައުންސިލް މެދުވެރިކޮށް އެ މީހުންނަށް ވަނީ ވަގުތީ ބޯހިޔާވަހިކަމާއި ކެއިންބުއިމުގެ ކަންކަން ހަމަޖައްސައިދީފަ އެވެ. ކައުންސިލުން ބުނީ އެ މީހުންނަށް ދާއިމީ ބޯހިޔާވަހިކަން ދިނުމުގެ މަސައްކަތް މިހާރު ކުރަމުންދާ ކަމަށެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
