ތެލެސީމިއާ ކުދިންނަށް ލޭ ހޯދުމުގައި ދިމާވާ ދަތިތަކަށް ހައްލު ހޯދުމަށް ކުރާ މަސައްކަތުގެ ދަށުން ލޭ ހަދިޔާ ކުރާ މީހުންގެ ދަފްތަރު ޑިޖިޓަލައިޒްކޮށް، އާންމުކުރުމުގެ މަސައްކަތް ކުރަމުން އަންނަކަމަށް ހެލްތު މިނިސްޓަރު އަބްދުﷲ ނާޒިމް މިއަދު ވިދާޅުވެއްޖެ އެވެ.
Advertisement
މިނިސްޓަރު ނާޒިމް މިހެން ވިދާޅުވީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމް ލޭގެ ހިދުމަތާ ގުޅޭގޮތުން ކުރެއްވި ސުވާލަށް ލިޔުމުން ފޮނުއްވެވި ޖަވާބުގަ އެވެ.
ޖެނުއަރީ 25 ގައި މެންބަރު ކުރެއްވި ސުވާލަށް ޖަވާބު ދެއްވަމުން މިނިސްޓަރު ނާޒިމް ވިދާޅުވީ މި ހިދުމަތް ޒަމާނީ ކުރުމުން، ޖަމްއިއްޔާތަކާއި ކުންދުނިތައް އަދި އަމިއްލަ މީހުންގެ ތެރެއިން ލޭ ހަދިޔާކުރާ މީހުންނާއި އެ މީހުންގެ ލޭގެ ގްރޫޕް ހިމެނޭ ގޮތަށް ރަޖިސްޓްރީވުމާއި ލޭ ހަދިޔާކުރުމުގެ ކޭމްޕުތައް އިންތިޒާމުކޮށް، ލޭގެ ގްރޫޕުތައް ހުރި ސަރަހައްދުތައް މެޕް ކުރެވި، ލޭ ހޯދުމަށް ދިމާވެފައިދާ ދަތިތަކަށް ވަށާޖެހޭ ހައްލެއް ހޯދޭނެ ކަމަށެވެ.
"ތެލަސީމިއާ ކޮންޓްރޯލް ކުރުމުގެ ގާނޫނުގައި ބަޔާންކުރާ ތެލަސީމިއާ ކުދިންގެ ގައުމީ ދަފްތަރުގައި ވަންގަވް މެދުވެރިކޮށް ރަޖިސްޓްރީ ވުމާއި އަދި ރަޖިސްޓްރީ ބެލެހެއްޓުން 2026 ޖެނުއަރީ މަހު ފެށިފައި ވެއެވެ. އަދި، ކުރިޔަށް ޕްލޭން ކުރެވިފައި ހުރި މުހިންމު ޕްރޮޖެކްޓްތަކުގެ ތެރޭގައި ނުހަނު އިސްކަމެއް ދޭންޖެހިފައިވާ ލޭ ހަދިޔާ ކުރާ ފަރާތްތަކުގެ ރަޖިސްޓަރ މިވަގުތު ބަލަހަށްޓަމުން އަންނަ މެނުއަލް ސިސްޓަމުން އޮންލައިން އިންފޮމޭޝަން ސިސްޓަމަކަށް ބަދަލުކުރުމުގެ މަސައްކަތް ވަނީ ފެށިފަ އެވެ. އަދި ޑޯނާ ރަޖިސްޓްރީ އާއި ޑޯނާ ރެކްރޫޓްމަންޓް ޕޯޓަލް ވެބްސައިޓާއެކު ޚާއްސަ އެޕްލިކޭޝަނެއް މިހިނގާ 2026 ވަނަ އަހަރުގެ އޮކްޓޫބަރު މަހުގެ ނިޔަލަށް ބޭނުންކުރަން ފެށުމަށް ވަނީ ކަނޑައެޅިފައެވެ،". ނާޒިމް ލިޔުމުން ދެއްވި ޖަވާބުގައި ވެއެވެ.
ދިވެހިރާއްޖޭގެ ލޭ ހޯދުމުގެ ނިޒާމު ހަރުދަނާ ކުރުމަށްޓަކައި ޑިޖިޓަލް ޕްލެޓްފޯމެއް ތައާރަފު ކުރުމުގެ ބޭނުމަކީ، ލޭ ދިނުމަށް ތައްޔާރު ވެފައިވާ ފަރާތްތަކުގެ ޑޭޓާ ބޭސްއެއް ވުޖޫދު ވުމުން ލޭ ހޯދުމުގައި ދިމާވަމުން އަންނަ ދަތިތަކަށް، ވަށާޖެހިފައިވާ ހައްލެއް އިންފޮމޭޝަން ޓެކްނޮލޮޖީގެ ޒަރިއްޔާއިން ލިބިގެން ދިޔުންކަމަށް ވެސް ނާޒިމް ވިދާޅުވި އެވެ.
