ރައީސް ޑރ. މުހައްމަދު މުއިއްޒުގެ ކެބިނެޓްގައި ހިމެނިވަޑައިގަންނަވާ 10 ވަޒީރަކު އިއްޔެ އިސްތިއުފާދެއްވުމުން އަލުން ކެބިނެޓް އެކުލަވާލާ ރޭ ވަނީ ހުވާކުރައްވާފައެވެ.
ކެބިނެޓުން ބަދަލުނުވި ވަޒީރުންވެސް ރޭ ވަނީ ހުވާކުރައްވާފައެވެ. ރޭ ހުވާކުރެއްވުމަށްފަހު އެކްސްގައި ކުރެއްވި ޕޯސްޓެއްގައި މިނިސްޓާ އޮފް ހޯމްލޭންޑް ސެކިއުރިޓީ، ލޭބާ އެންޑް ޓެކްނޮލޮޖީ އަލީ އިހްސާން ވަނީ އޭނާ އަލުން ވަޒީރުކަމަށް އައްޔަންކުރުމުން ފަހްރުވެރިވެ އުފާކުރާކަން ހާމަކުރައްވާފައެވެ. އިހްސާން ވިދާޅުވީ އާ މަސްއޫލިއްޔަތުގެ ދަށުން އޭނާ މަސައްކަތްކުރައްވާނީ ރައްކާތެރި ބާއްޖަވެރި ރާއްޖެއެއް ބިނާކުރަންކަމަށެވެ.
އިހްސާން ވިދާޅުވީ އޭނާގެ ލަޔާގަތާއި ގާބިލުކަން ތަންދިން އެންމެ މަތީދަރަޖައަކަށް ދިވެހިރާއްޖެއަށް ހިދުމަތް ކުރުމުގައި އަބަދުމެ ދެމިހުންނާނެ ކަމުގެ ޔަގީންކަން ދިވެހި ރައްޔިތުންނަށް އަރުވާކަމަށެވެ. އަދި ގުޅިގެން ބަދަހި ރައްކާތެރި އީޖާދީ މުސްތަގުބަލެއް ބިނާކުރަން މަސައްކަތް ކުރުމަށް އިހްސާން ވަނީ ގޮވާލައްވާފައެވެ.
މިސަރުކާރުގެ 20 މިނިސްޓްރީ މަސައްކަތްތަކަށް ބަދަލުގެނެސް މިނިސްޓްރީތަކުގެ އަދަދު 15 އަށްް ވަނީ މަދުކޮށްފައެވެ.
