ކުރިން "ބެޓްލް އޮފް ގަލްވާން" ގެ ނަމުގައި އުފައްދަން ފެށި މި ފިލްމު ސެންސަރު ބޯޑަށް ހުށަހެޅުން ވެސް މިހާރު ވަނީ ވަގުތީ ގޮތުން ހުއްޓިފަ އެވެ.
މި ފިލްމު ރިލީޒްކުރުން ލަސްވަމުންދާ އެންމެ ބޮޑު ސަބަބަކީ އިންޑިއާ އާއި ޗައިނާގެ ސިފައިންގެ މެދުގައި ހިނގި ގަލްވާން ވާދީގެ ހާދިސާއާ ގުޅުންހުރި މަންޒަރުތައް ފިލްމުން އުނިކުރަން ޖެހުމެވެ. އިންޑިއާގެ ޑިފެންސް މިނިސްޓްރީގެ އެންގުމަށް، ފިލްމުގެ 40 ޕަސަންޓު މަންޒަރުތައް އަލުން ކުޅެން ޖެހުނެވެ. މި ބަދަލުތަކާއެކު ފިލްމުގެ މުޅި މިސްރާބު މިހާރު ވަނީ ހަނގުރާމައިގެ ފިލްމަކުން، އިންސާނީ ކަރާމާތާއި ލޯތްބާއި ގުރުބާނީގެ މައްޗަށް ބިނާވެފައިވާ އަސަރުގަދަ ފިލްމަކަށް ބަދަލުކޮށްފަ އެވެ.
މީގެ އިތުރުން، މިދިޔަ މާޗް މަހު މި ފިލްމުގެ މުހިންމު ރޯލެއް ކުޅުނު އެކްޓަރު ޕްރަޝާންތު ތަމަންގު ކުއްލި ގޮތަކަށް މަރުވުމަކީ ވެސް ފިލްމުގެ މަސައްކަތް ހުއްޓެން ދިމާވި ސަބަބެކެވެ. އޭނާ ކުޅެން ޖެހޭ ބައެއް މަންޒަރުތައް ނުނިމި ހުރުމުން، އެ މަންޒަރުތައް ފުރިހަމަކުރުމަށް އޭއައި ނުވަތަ ވީއެފްއެކްސް ބޭނުންކުރުމާ މެދު މިހާރު ދަނީ މަޝްވަރާ ކުރަމުންނެވެ.
އަޕޫރްވާ ލަކިއާ ޑައިރެކްޓްކޮށް، ޗިތުރަންގަދާ ސިންގް މުހިންމު ރޯލަކުން ފެންނަ މި ފިލްމު ރިލީޒްކުރާނެ ވަކި ތާރީހެއް އަދި އިއުލާނެއް ނުކުރެ އެވެ. ފިލްމު އުފައްދާ ފަރާތުން ބުނީ މިހާރު އެންމެ އިސްކަމެއް ދެނީ ޑިފެންސް މިނިސްޓްރީގެ ހުއްދަ ހޯދުމަށް ކަމަށެވެ. މިއީ ބޮލީވުޑްގެ ހަބަރުތަކުގެ ތެރެއިން މިވަގުތު އެންމެ ބޮޑު ސަމާލުކަމެއް ލިބިފައިވާ އެއް ހަބަރެވެ.
