ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހްސާން ވިދާޅުވީ ރާއްޖޭގައި ގަވައިދާ ހިލާފަށް އުޅެމުންދާ ބިދޭސީންގެ މައްސަލަ ހައްލުކުރުމަށް 2024 ވަނަ އަހަރުގެ މޭ މަހު ކުރަނގި އޮޕަރޭޝަން ފެށިއިރު ވާކް ޕާމިޓް ފީއެއް ނުދައްކާ އަދި ވިސާއެއް ނެތި 148417 ބިދޭސީން ރާއްޖޭގައި އުޅެމުންިދޔަ ކަމަށެވެ. އެހެނަމަވެސް އެންމެނަކީ ރާއްޖޭގައި ތިބި މީހުންކަމެއް ކަށަވަރުކުރެވިފައި ނުވާކަމަށް މިނިސްޓަރު އިހްސާން ވިދާޅުވިއެވެ.
ގަވައިދާ ހިލާފަށް އުޅެމުންދިޔަ ބިދޭސީން ގަވައިދަށް ފެއްތުމަށް "އޮޕަރޭޝަން ކުރަނގި" ފެށިއިރު ގަވައިދަށް ތިބި ބީދޭސީންގެ އަދަދަކީ 28.97 އިންސައްތަ މީހުންކަމަށް މިނިސްޓާރު ވިދާޅުވިއެވެ. އަދި މިދިޔަ ދެ އަހަރު ކުރި މަސައްކަތުން އެ އަދަދު 62 އިންސައްތައަށް އިތުރުކުރެވިފައިވާކަމަށްވެސް މިނިސްޓަރު އިހްސާން ވިދާޅުވިއެވެ.
އިހްސާން ވިދާޅުވީ މިހާތަނަށް ޕިންގަރ ޕްރިންޓް ނަގާ މައުލޫމާތު އެއްކުރި ބިދޭސީންގެ އަދަދު 206،000 އަފާފައިވާކަމަށެވެ. އަދި ފިންގަޕްރިންޓް ނުދީ އަދިވެސް 2،933 މީހަކު އެބަ ތިއްބިކަމަށާއި އެއީ ކޮން ބައެއްކަންވެސް ދެނެގަނެވިފައިވާކަމަށް އިހްސާން ވިދާޅުވިއެވެ.
މިނިސްޓަރު އިހްސާން ވިދާޅުވީ އަންނަ މަހުގެ 2 ވަނަ ދުވަހުން ފެށިގެން "އޮޕަރޭޝަން ކުރަނގި" ގެ ފޭސް 3 ގެ މަސައްކަތް ފަށާނެކަމަށެވެ. އަދި އެދުވަހުން ފެށިގެން ކުރިއަށް އޮތް އެއް އަހަރުގެ ތެރޭގައި ފިންގާ ޕްރިންޓާއި މައުލޫމާތު ނުދޭ ބިދޭސީން ހޯދާ އެމީހުން ހައްޔަރުކޮށް ރާއްޖެއިން ޑީޕޯޓް ކުރަން ފަށާނެކަމަށްވެސް މިނިސްޓަރު އިހްސާން ވިދާޅުވިއެވެ.
