މި ސަރުކާރުގައ ނުފޫޒު ގަދަކަމަށް ބެލެވޭ ނާޒިމް މިދިޔަ ހޯމަ ދުވަހު ވަނީ އޭނާ ހިމެނިވަޑައިގެންނެވި މަޖލީހުގެ އެންމެ ބާރު ގަދަ ދެ ކޮމެޓީން ވަކިކޮށްފައެވެ. ނާޒިމް ވަކިކޮށްފައިވަނީ މަޖިލީހުގެ މާލިއްޔަތު ކޮމެޓީ އާއި ސަލާމަތީ ހިދުމަތްތަކާއި ބެހޭ (241) ކޮމެޓީންނެވެ.
އެއާއި އެކު އޭނާއައި ގުޅުންހުރި އިންޓެލިޖެންސް ރިޕޯޓެއް ފުލުހުން އެކުލަވާލާފައިވާކަމަށާއި އެ މައްސަލަ ފުލުހުން ބަލަމުން އަންނަކަމުގެ އަޑުތައް ވަނީ ފެތުރިފައެވެ.
މިއަދު ހޯމް މިނިސްޓަރު އަލީ އިހްސާން ރައިސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ބައެއް ނޫސްވެރިން ވަނީ އެކަމާއި ގުޅިގެން މިނިސްޓަރާ ސުވާލުކޮށްފައެވެ. އެ ސުވާލަށް ޖަވާބުދެއްވަމުން އިހްސާން ވިދާޅުވީ އެއީ ދޮގު މައުލޫމާތެއް ކަމަށާއި ނާޒިމާއި ގުޅޭ އެފަދަ އެއްވެސް ތަހުގީގެއް ހިންގަމުންނުދާ ކަމަށެވެ. އަދި ނޫސްވެރިން މައުލޫމާތު ނަގާ ފަރާތް ނުބައިކަމަށާއި އެ ފަރާތް ބަދަލުކުރަން ނޫސްވެރިންނަށް އިހްސާން ވަނީ ގޮވާލައްވާފައެވެ.
މަޖިލީހުގެ ބާރުގަދަ ދެ ކޮމެޓީން ނާޒިމް ވަކިކޮށް އޭނާ ވަނީ މަޖިލީހުގެ އެންވަޔަރަމަންޓް ކޮމެޓީއަށް ބަދަލުކޮށްފައެވެ. އެހެންނަމަވެސް މި ބަދަލު ގެނައި ސަބަބެއް ވެރިކަން ކުރާ ޕީއެންސީއަކުން ނުބުނެއެވެ.
