މިދިޔަ މާރިޗު މަހުގެ ބިލްތައް ބޮޑުވެ އާންމުން ވަނީ ޝަކުވާ ބޮޑުވެފައެވެ.
އާއްމުންގެ އެ ޝަކުވާތަކަށް ދައުލަތުގެ މީޑިއާ މެދުވެރިކޮށް ފެނަކަ އިން ރޭ ވަނީ ޖަވާބުދާރީވެފައެވެ. ފެނަކައިގެ ޗީފް ޓެކްނިކަލް އޮފިސަރު އަބްދުﷲ ނާޝިތު ވިދާޅުވީ ރާއްޖޭގައި ހޫނު މޫސުން އަންނަނީ މާޗު އޭޕްރީލް ހިސާބުގައިކަމަށެވެ. އެހެންކަމުން ފެބްރުއަރީ ފަހުކޮޅުން ފެށިގެން އޭޕްރީލްގެ ނިޔަލަށް އާންމުކޮށް ބިލުތައް ބޮޑުވަމުންދާކަމަށް އޭނާ ވިދާޅުވިއެވެ.
މިދިޔަ އަހަރުގެ ހޫނު މޫސުމުގައިވެސް ރައްޔިތުންގެ މި ޝަކުވާތައް ލިބުނުކަމަށާއި އެހެންނަމަވެސް ބިލު ހެދުމުގެ އްއްވެސް މައްސަލައެއް ނެތްކަން ޔަގީންކުރެވޭ ކަމަށް ނާޝިތު ވިދާޅުވިއެވެ.
ފެނަކައިގެ ޗީފް ޑިވެލޮޕްމެންޓް އޮފިސަރު މުހައްމަދު ޝުޖާއު ވިދާޅުވީ ރޯދަމަހުގެ ކަރަންޓު ބިލުން 400ރ. ގެ ޑިސްކައުންޓެއް ސަރުކާރުން ހަމަޖައްސައިދިނުމުން ކަރަންޓު ބޭންކުރާ ވަރު އިތުރުވެފައިވާކަމަށެވެ. އަދި އޭގެ ފަހުން އައި އިދާ ޝައްވާލްމަހުގެ ހަ ރޯދައިގައިވެސް މީހުން ކަރަންޓް ބޭނުންކޮށްފައިވަނީ އެގޮތަށްކަން ފާހަގަކޮށް އެދުވަސްތައް ހިމެނުނީ ފަހުގެ ބިލުގައިމަަށް ޝުޖާއު ވިދާޅުވިއެވެ.
މާޗް މަހުގެ ކަރަންޓު ބިލުތައް އާދަޔާ ހިލާފަށް ބޮޑުވެފައިވާކަމުގެ ޝަކުވާ ގިނަ ބަޔަކު ކުރާތީ، މައްސަލައެއް އުޅޭ ކަމަށް ޝައްކު ކުރެވޭ ބިލްތައް ޗެކްކޮށްދޭނެ ކަމަށް ފެނަކަ ކޯޕަރޭޝަނުން ވަނީ ބުނެފައެވެ.
