ޕީއެންއެފް ޖޫރިމަނާކުރިކަން އަންގާ އިލެކްޝަންސް ކޮމިޝަން (އީސީ) އިން ވަނީ އިއްޔެ އެޕާޓީގެ ލީޑަރު، ރައީސް ޔާމީނަށް ސިޓީއަކުން އަންގާފައެވެ.
އެސީޓީގައި ވަނީ ޕީއެންއެފުން ސިޔާސީ ޕާޓީގެ ގާނޫނުތަކާ ގަވާއިދުތަކާ ތަކުރާރުކޮށް ހިލާފުވެފައިވާކަމަށެވެ. އަދި އެކަން ތަކުރާރުކޮށްް ނުކުރުމަށް އެންގުމުންވެސް ހުއްޓާލާފައި ނުވާކަމަށާއި އެ ޕާޓީއާ ބައްދަލު ކުރުމަށް އީސީން އެދުމުންވެސް އެކަމާއި ދެކޮޅު ހަދާ ބައްދަލުކޮށްފައި ނުވާކަމަށެވެ. އެހެންކަމުން އެޕާޓީ 100،000 ރުފިޔާއިން ޖޫރިމަނާކޮށްފައިވާކަމަށްވެސް އީސީން ފޮނުވި ސިޓީގައިވެއެވެ.
ޖޫރިމަނާކުރުމުގެ ޕީއެންއެފް އާއި އެ ޕާޓީއަށް ނިސްބަތްވާ މީހުން ސިޔާސީ ޕާޓީގެ ގާނޫނާ ހިލާފަށް އަމަލުނުކުރާނަމަ، އެ އަމަލެއް ހިންގާ މީހަކަށް ވެސް ގާނޫނީ ފިޔަވަޅު އަޅާނެ ކަމުގެ އިންޒާރުވެސް އިލެކްޝަންސް ކޮމިޝަނުންް އެ ޕާޓީއަށް ފޮނުވި ސިޓީގައިވަނީ ދީފައެވެ.
ސިޔާސީ ހަރަކާތްތައް ހިންގޭނީ ޕާޓީތަކުގެ ގާނޫނާއި ސިޔާސީ ޕާޓީތަކުގެ ގަވާއިދާއި ސުލްހަވެރިކަމާއެކު އެއްވެ އުޅުމުގެ ގާނޫނު އަދި ރާއްޖޭގައި އަމަލުކުރަމުންދާ އެހެނިހެން ގަވާއިދުތަކުގެ ހުދޫދުގެ ތެރެއިންކަމަށް އިލެކްޝަންްސް ކޮމިޝަނުން ވަނީ ބުނެފައެވެ.
