ރޭ ޕީއެންސީން ބޭއްވި ހަރުގޭ ޖަލްސާގައި ވާހަކަ ދައްކަވަމުން ފަލާހު ވަނީ އައްބާސްގެ މައްޗަށް ބޮޑެތި ތުހުމަތުތަކެއް ކުރައްވާ ވާހަކަ ދައްކަވާފައެވެ. އެގޮތުން "އައިޝާ" ކިޔާ އަންހެނަކާއި އެކު ބޭއްވި ގުޅުމެއްގެ ސަބަބުން އެކަން ފަޅާ އަރާ އާއިލާ ރޫޅިފައިވާކަމަށެވެ. މި ޖަލްސާގައި ރައީސް މުއިއްޒުވެސް އިންނެވިއެވެ.
މި ވާހަތަކާއި ގުޅިގެން އައްބާސް އެކްސްގައި ކުރެއްވި ޕޯސްޓެއްގައި ވިދާޅުވީ އެމަނިކުފާނުގެ އަބުރައް ހުތުރުވާގޮތަށް އަދި އަނބި ދަރިންނާ ބެހޭ ގޮތުން މެމްބަރު އިބުރާހިމް ފަލާހު ދެއްކެވި ހަޤީގަތާ ހިލާފު ދޮގު ހަޑި ހުތުރު ވާހަކަތަށް އެންމެ ހަރުކަށި އިބުރާތުން ކުށްވެރިކުރާކަމަށެވެ. އަދި ފަލާހު ދެއްކެވީ މުޅިންވެސް ދޮގު ވާހަކަތައްކަމަށް އައްބާސް ވިދާޅުވިއެވެ.
ފަލާހް ދެއްކި ވާހަކަތަކާއި ގުޅިގެން ހޯދަންޖެހޭ ޤާނޫނީ ލަފާ ހޯދުމަށް ފަހު އަބުރުގެ ދައުވާ ކުރުމަށް ކުރަންޖެހޭ މަސައްކަތްތައް ކުރަމުން އަންނަކަމަށްވެސް އައްބާސް ވިދާޅުވިއެވެ.
ރޭގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ އިދިކޮޅު ފަރާތްތަކުން އެމަނިކުފާނާއި ގުޅޭގޮތުން ހަގީގަތެއް ނެތް ދޮގު ވާހަކަތައް ދައްްކަނީ ސަރުކާރުގެ ސިޔާސަތުތަކާއި ގުޅިގެން ދައްކާނެ ވާހަކަތަކެއް ނެތުމުންކަމަށެވެ. އަދި މީހުން ދައްކާ އެ ވާހަކަތައް ގަބޫލުނުކުރުމަށްވެސް އެމަނިކުފާނުގެ ސަޕޯޓަރުންގެ އަރިހުން ރައީސް މުއިއްޒު ވަނީ އެދިވަޑައިގެންފައެވެ.
