ރައީސް ނަޝީދު މިހެން ވިދާޅުވީ ރ. ދުވާފަރުގައި އިއްޔެ ބޭއްވި ބައްދަލުވުމެއްގައި އެ ރަށު އެމްޑީޕީ މެމްބަރަކު ކުރި ސުވާލަކަށް ޖަވާބު ދެއްވަމުންނެވެ.
އެ ބައްދަލުވުމުގައި ބައިވެރި އެމްޑީޕީ މެމްބަރަކުވަނީ ރައީސް ނަޝީދު އެމްޑީޕީން ވަކިވެޑައިގަތުމުން އެކަމާއި ދެރަވިކަމަށް ބުނެފައެވެ. އަދި އެކަމުގެ ސަބަބުން އެމްޑީޕީއަށް ގެއްލުންތަކެއްް ލިބުނުކަމަށާއި އެއީ ނަޝީދަށް ހެއްދެވުނު ގޯހެއްކަމަށް ބަލާ މެމްބަރުންގެ ކިބައިން މައާފަށް އެދިވަޑައިގަންނަވަން ފެންނަކަމަށް އެމީހާ ވަނީ ބުނެފައެވެ.
އެ ސުވާލަށް ޖަވާބުދެއްވަމުން ނަޝީދު ވަނީ އެމަނިކުފާނު އެމްޑީޕީން ވަކިވި ސަބަބުތައް ވިދާޅުވެފައެވެ. އެގޮތުން އޭރުގެ ރައީސް އިބްރާހިމް މުހައްމަދު ސާލިހް، އެމަނިކުފާނާއި ވާހަކަ ނުދައްކަވާކަމަށް ވިދާޅުވިއެވެ.
މީގެ އިތުރުން ނަޝީދު ޕާޓީން ވަކިވި ސަބަބުތަކުގެ ތެރޭގައި އެމަނިކުފާނަށް ދިން ބޮމުގެ ހަމަލާ ރަނގަޅަށް ނުބެލުމުގެ އިތުރުން އެމަނިކުފާނާއި ގާތްމީހުން ޕާޓީން ވަކިކުރަން އުޅުނުކަންވެސް ނަޝީދު ފާހަގަކުރެއްވިއެވެ.
ނަޝީދު ވަނީ އެމަނިކުފާނު ގޯސްކަން ކަންކަން ކޮށްފައިވާކަމަށް ވިދާޅުވެ އެމްޑީޕީގެ މެމްބަރުންގެ ކިބައިން މައާފަށް އެދިފައެވެ. އެހެންނަމަވެސް އެމްޑީޕީގެ މެމްބަރުންވެސް އެމަނިކިފާނު ކިބައިން މައާފަށް އެދެންޖެހޭކަމަށްވެސް ވިދާޅުވިއެވެ. އެހެންނަމަވެސް ސަބަބެއް އެމަނިކުފާނު ވިދާޅެއް ނުވެއެވެ.
އެމްޑީޕީގެ ޗެއާޕާސަން އިންތިހާބުގެ ފޯރި ވަނީ ވަރަށް ވަރުގަފަވެފައެވެ. މި އިންތިހާބު އޮންނާނީ އަންނަމަހުގެ 12 ވަނަދުވަހުއެވެ.
