ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ދިވެހި ވަތަނީ ހިދުމަތުގެ ތަމްރީނުގެ ދެވަނަ ބެޗް ފުރިހަމަ ކުރި ޒުވާނުންގެ ތެރެއިން ބައެއް ކުދިން މިއަދު ބ. ކިހާދޫގައި ޤާއިމު ކޮށްފައިވާ އެމް.އެން.ޑީ.އެފްގެ ސްކޫލް އޮފް އިންޖިނިއަރިން އެންޑް ލޮޖިސްޓިކްސް ފުރާފައިވާކަމަށެވެ. މި ކުދިން އެ މަރުކަޒަށް ދިޔައީ ދިވެހި ވަތަނީ ހިދުމަތުގެ ފަންނީ ތަމްރީނުގައި ބައިވެރިވުމަށްކަމަށްވެސް ރައީސް މުއިއްޒު ވިދާޅުވިއެވެ.
ވަތަނީ ހިދުމަތުގެ ފަންނީ ތަމްރީނަށް
ރައީސް ވިދާޅުވީ ކިހާދޫގައި ހުންނަ ސިފައިންގެ މަރުކަޒަށް މިއަދު ފުރި ކުދިންގެ ތެރޭގައި ރާއްޖޭގެ 17 އަތޮޅެއްގެ 50 ރަށަކަށް ނިސްބަތްވާ ކުދިން ހިމެނޭކަމަށެވެ. އޭގެތެރޭގައި 16 އަހަރާއި 19 އަހަރާއި ދެމެދުގެ 77 ޒުވާނުން ތަމްރީނުތަކުގައި ބައިވެރިވާކަން ރައީސް މުއިއްޒު ފާހަގަކުރެއްވިއެވެ. އަދި އެ ކުދިން މި ތަމްރީނުގައި ތަފާތު 6 ފަންނީ ދާއިރާތަކުން ތަމްރީނު ފުރިހަމަކުރުމުގެ ފުރުސަތު ލިބިގެން ދާނެކަމަށްވެސް ރައީސް ޑރ. މުހައްމަދު މުއިއްޒު ވިދާޅުވިއެވެ.
ހަ ކޯހުގެ ފަންނީ ތަމްރީނަށް ފަހު، ވަތަނީ ހިދުމަތުގެ ފުރަތަމަ ބެޗުގެ 63 ޒުވާނުން ދަސްވެނިވީ މިދިޔަ މަހުގެ ތެރޭގައެވެ.
މިއީ ދިވެހި ވަތަނީ ހިދުމަތުގެ ޕްރޮގްރާމްގެ އިނީޝިއަލް ޓްރެއިނިން ފުރިހަމަކުރާ ދަރިވަރުންނަށް އަމާޒުކޮށްގެން ކުރިއަށް ގެންދާ ހާއްސަ ޕްރޮގްރާމެކެވެ.
